Rýdnyı kásiporyndary eksport kólemin ulǵaıtpaq
QOSTANAI. QazAqparat –«Nur Otan» partııasy Qostanaı oblystyq fılıaly Rýdnyı qalasyndaǵy memlekettik baǵdarlamalardyń iske asyrylý barysymen tanysty, dep habarlaıdy QazAqparat.
Rýdnyı qalasynda «Nur Otan» partııasynyń «Indýstrıaldy damý» baǵytyndaǵy aımaqtyq komıssııa músheleriniń kóshpeli otyrysy ótti. Partııalyqtar men memlekettik organ ókilderi birqatar kásiporyndardy aralap, ındýstrıaldy-ınnovatsııalyq baǵdarlamalardyń iske asyrylý barysymen tanysty.
Komıssııa músheleri aldymen Rýdnyıdaǵy «Jas Qanat-2006» qus fabrıkasyna bardy. Jańǵyrtý jumystarynyń úsh kezeńinen ótken kásiporynda, barlyq ınfraqurylym júıeleri ótkizilip, joǵary tehnologııalyq jabdyqtar satyp alynǵan. Investıtsııa kólemi 3 mlrd teńgeden asady. Suryptaý tsehynda saǵatyna 120 myń jumyrtqa shyǵaratyn Nabel atty japondyq jabdyq ornatylǵan. Óndiristi avtomatızatsııalaý arqyly 8 saǵattyq jumys kúninde 1 mln jumyrtqaǵa deıin tasymaldaýǵa bolady.
«Jańǵyrtý sharalary aıasynda jumyrtqa, et jáne t.b. ónimderdi tereń óndeýdiń avtomatty jelisin qosýdy josparlap otyrmyz. 2019-2021 jyldar aralyǵynda tuqymdy reprodýktordyń qurylysy bastalady. Bul jabdyq tolyq avtomattandyrylǵan. Jobanyń sátti júzege asýy ımport kólemin 40% tómendetýge múmkindik beredi», - deıdi «Jas-Qanat 2006» JShS damytý boıynsha dırektory Aleksandr Korostylev.
