Rýdnyı ákiminiń orynbasary dóreki sózi úshin qyzmetinen qýylýy múmkin
Іs memlekettik qyzmet týraly zańnama talaptaryn jáne QR memlekettik qyzmetshileriniń ádep kodeksiniń normalaryn saqtamaý faktisi boıynsha qaraldy.
«Bıyl 28 qyrkúıekte saǵat 12:00 shamasynda Rýdnyı ákimdiginiń ǵımaratynda ákim orynbasary Á.K. Esqatov pen Rýdnyı ákimdiginiń ǵımaratyna qyzmet kórsetý jónindegi komendant L. A. Tımohına jáne M. Z. Djambýrchına arasynda janjal týyndaǵany anyqtaldy. Janjalǵa Rýdnyı qalasy ákimdigi ǵımaratynyń artqy esiginiń jabyq bolýy sebep boldy. Máseleniń mán-jaıyn anyqtaý barysynda Á. K. Esqatov ákimdik qyzmetkerleri, kúzetshi jáne ákimdikke kelýshilerdiń kózinshe L. A. Tımohınanyń atyna beıádep sózder aıtqan. Janjal kýágerleri Á. Esqatovtyń etıkaǵa jat sózder aıtqanyn rastady», - dep habarlaıdy memlekettik qyzmet isteri agenttiginiń departamenti.
Ákim orynbasary Ánýar Esqatov pen janjaldasýshylardyń túsinigin tyńdaı kele, ádep jónindegi keńes músheleriniń kópshilik daýsymen «Qazaqstan Respýblıkasynyń memlekettik qyzmeti týraly» Zańnyń jáne Ádep kodeksiniń normalaryn saqtamaǵany úshin Ánýar Esqatovty qyzmetinen bosatý týraly sheshim qabyldandy.
Ánýar Esqatov óz kinásin moıyndap, memlekettik qyzmetker úshin teris áreket ekendigin aıtty. Degenmen Ádep keńesiniń sheshimi tym qatal dep sanaıdy.
«Men memlekettik qyzmetke 16 jylymdy arnadym. Áreketimniń durys emes ekendigin jáne maǵan abyroı ákelmeıtinin túsinemin. Men áreketimdi aqtamaımyn, ózimdi olaı ustamaýym kerek edi. Biraq biz pendemiz. Áleýmettik jeliler men BAQ-qa shyqqan meniń áreketime qatysty jaıttar, maǵan jáne otbasyma aýyr tıedi. Degenmen ádep keńesiniń sheshimi tym qatal. Keńes músheleriniń jaza túrinde sońǵy eskertý jasaýǵa múmkindigi boldy. Biraq meni jumystan shyǵarýdy usyndy. Bul meniń áreketime sáıkes kelmeıtin jaza», - deıdi Ánýar Esqatov.
Ázirge Á. Esqatov Rýdnyı ákiminiń orynbasary qyzmetin jalǵastyrýda. Sońǵy sheshimdi ádep jónindegi keńestiń usynymyn nazarǵa ala otyryp Rýdnyı ákimi qabyldaıdy.
