Rýdnyı ákimi sógis aldy
QOSTANAI. QazAqparat - Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qostanaı oblysy boıynsha departamentiniń sheshimimen Rýdnyı qalasynyń ákimi Baqytjan Ǵaıazovqa sógis berildi, dep habarlaıdy QazAqparat.
Atalǵan departament basshysy Erlan Salyqbaevtyń sózinshe, byltyr para alý kezinde ustalǵan Rýdnyı qalasy ákiminiń burynǵy orynbasary Maqsut Dospolovqa qatysty sot úkiminen soń, onyń tikeleı basshysy da jazaǵa tartyldy. Eske salsaq, Maqsut Dospolov QR QK 366-baby, 3-tarmaǵy boıynsha aıypty dep tanylyp, 8 jylǵa bas bostandyǵynan aıyryldy.
«Eger basshynyń ózi nemese onyń kelisimimen taǵaıyndalǵan adam sybaılas jemqorlyqqa barsa, onda oǵan qatysty profılaktıkalyq sharalar qoldanylady. Memlekettik saıası qyzmetshilerge tártiptik jaza qoldaný qaǵıdalaryn bekitý týraly erejege sáıkes, Rýdnyı qalasynyń ákimi Baqytjan Ǵaıazovqa sógis berildi»,- dedi Salyqbaev.
Budan bólek, departament basshysy oblystaǵy memqyzmettiń sapasy týraly sóz etti. «Elbasynyń «Ult jospary» baǵdarlamasy boıynsha, memlekettik qyzmette satylap órleý tek konkýrs arqyly, ıaǵnı, merıtokratııa prıntsıpi (sińirgen eńbegine qaraı qyzmettik satyda ósirý) arqyly júzege asyrylady. Óńirdegi memlekettik organdar jarııalaıtyn barlyq konkýrstardyń 48%-y - ishki, qalǵany - syrtqy, ıaǵnı, jalpy baıqaý. Byltyr ishki konkýrstardyń nátıjesi boıynsha 281 úmitker qabyldansa, olardyń 187-i joǵary qyzmetke laıyq tanyldy. Demek merıtokratııa prıntsıpi saqtalýda. Bul qyzmetke taǵaıyndaýdaǵy ashyqtyqty ári ádildikti qamtamasyz etedi», - dedi E.Salyqbaev.
Jıynda, belgili bolǵandaı, Qostanaı oblysy - elimizdegi ákimshilik aýdandary men memlekettik qyzmetkerler sany eń kóp óńirlerdiń biri. 20 aýdan-qalada 746 memlekettik organ bolsa, olarda 6381 shtat birligi bar.
