Rýdnyıdyń jylý júıeleri jekeshelendirýge berilmeýi múmkin

ASTANA. KAZINFORM — Qostanaı oblysynyń ákimi Qumar Aqsaqalov «Rýdnyı jylý jelileri» JShS-in jekeshelendirýge berý áli erte ekenin málimdedi.

Ortalyq kommýnıkatsııalar qyzmetinde ótken baspasóz máslıhatynda tilshiler oblys ákiminen bul kásiporyn nelikten básekeles ortaǵa beriletin aktıvter tizimine engizilgenin surady.

Óz kezeginde Q. Aqsaqalov Ulttyq ekonomıka mınıstrliginde nysandardy jekeshelendirý jospary bar ekenin, onyń arasynda turǵyn úı-kommýnaldyq sharýashylyq sektoryndaǵy aktıvter qamtylǵanyn eske saldy.

— Rýdnyı qalasyndaǵy jylý jelilerine arnalǵan bul jospardy 2030 jylǵa deıin júzege asyrý eskerilgen. Árıne, osy baǵytta qomaqty ınvestıtsııa saldyq, olardy jańǵyrttyq. Buryn olar jekemenshikte bolǵan. Qazir osy nysan jekeshelendirý josparyna engizilgen. Atap aıtqanda, jekeshelendirýdiń bul kezeńin júzege asyrý áli erte dep sanaımyn, óıtkeni olardy jańǵyrtyp, qomaqty qarajat saldyq, — dedi oblys ákimi.

Onyń paıymynsha, jekeshelendirý máselesi 2030 jylǵa qaraı tolyǵymen qaıta qaralýy yqtımal.

— Memleket jylý jelilerin jańǵyrtýǵa kóp qarajat jumsaǵanyn eskere otyryp, olar nysandy tizimnen alyp tastaýy da múmkin. Sondyqtan mınıstrlik bul baǵytta utymdy sheshimdi qabyldaıdy. Osy taqyryp boıynsha óz pikirimdi jazyp, bul nysandy jekeshelendirý áli erte ekenin aıttym, — dep atap ótti Qumar Aqsaqalov.

Eske salsaq, bıyl kúzde Rýdnyıdyń jylý júıeleri jekemenshikke berilýi múmkin ekeni málim boldy.