Rýdnyıdyń boıtumary: «Kenshi» músini qalaı paıda boldy
ASTANA. KAZINFORM - Rýdnyı qalasynyń kireberisindegi «Kenshi» músini - qalanyń eń tanymal nysandarynyń biri. Bul eskertkishtiń qalaı boı kótergeni jáne onyń astaryna qandaı maǵyna uıalaǵany jaıly qalalyq tarıhı-ólketaný mýzeıiniń ádiskeri Aleksandr Kýrgýzkın áńgimelep berdi.
Aleksandr Kýrgýzkınniń aıtýynsha, eskertkish 1972 jyly Rýdnyıdyń 15 jyldyǵyna oraı ornatylǵan. Onyń avtory - músinshi V. P. Zınaıkın, al sáýletshisi - V. Gnezdılov.
Kompozıtsııa qala qonaqtarynyń birinshi kórgeni osy bolsyn dep avtovokzal mańyna salǵan eken. Kenshiniń sol kezdegi sálemdesý ısharasy áli kúnge deıin óz mánin joǵaltpady.
- Qolyn alǵa sozyp turǵan kenshi tulǵasy - qalaǵa kelgenderge qurmet kórsetý men shaqyrýdy bildiredi. Alaıda alǵashqyda músinshiniń qoly bos bolǵan soń, qala turǵyndary eskertkishke túrli ataýlar taqqan. Keıinnen bul músinniń mánin aıqyndaý kenshiniń alaqanyna Rýdnyıdyń basty sımvoly - temir keniniń bir bóligi salyndy. Osylaısha músin qalanyń qonaqjaılylyǵy men tarıhynyń ajyramas nyshanyna aınaldy, - deıdi ádisker.
Eskertkish áý basta jas óndiristik qalanyń sımvoly retinde josparlanǵan. Onyń jalpy bıiktigi shamamen 12 metrdi quraıdy. Tuǵyry 5 metrge jýyq, al sozylǵan qolymen qosa eseptegende músinniń ózi de sondaı bıiktikke ıe.
Eń qyzyǵy músin tutas tastan nemese qoladan quıylmaǵan. Ol qańqaly konstrýktsııa boıynsha jasalyp, aýa raıynyń qolaısyzdyǵyna tózimdi arnaıy berik materıalmen qaptalǵan.
Ornatylǵan sátten bastap eskertkish birneshe ret qaıta qalpyna keltirý jumystarynan ótti. Aleksandr Kýrgýzkınniń aıtýynsha, «Kenshi» tek sáýlet nysany ǵana emes, Rýdnyı qalasynyń basty sımvoly bolyp qala bermek.
Buǵan deıin Rımde Abaı Qunanbaıulynyń músini ornatylǵanyn jazǵan edik.
