Rýdnyıdaǵy 650 mlrd teńgeniń jobasy keıinge shegerildi
ASTANA. KAZINFORM — Rýdnyıda qurylysyna buǵan deıin 650 mlrd teńgeden astam ınvestıtsııa salý josparlanǵan ystyq brıkettelgen temir óndiretin zaýyt jobasy belgisiz merzimge keıinge qaldyryldy. ERG kompanııasy ázirshe jobany iske qosatyn jańa merzimdi ataǵan joq. Sonymen qatar joba qaıta jandanǵan jaǵdaıda onyń óndiristik qýaty men ınvestıtsııa kólemi burynǵy jospardan ózgerýi múmkin.
ERG kompanııasy Kazinform saýalyna bergen jaýabynda ystyq brıkettelgen temir óndirý jobasyn iske qosýdyń ázirshe naqty merzimi joq ekenin habarlady.
Qazirgi ýaqytta ınvestıtsııalyq resýrstar basqa basym jobalarǵa baǵyttalǵan. Solardyń biri — jylyna 5 mln tonna joǵary temir quramdy okatysh óndiretin jańa zamanaýı fabrıkanyń qurylysy.
Zaýyt jobasynyń qýaty men quny qaıta qaralýy múmkin
Buǵan deıin ystyq brıkettelgen temir óndiretin zaýyttyń jylyna 2 mln tonna ónim óndiretini jáne jobaǵa 650 mlrd teńgeden astam ınvestıtsııa salynatyny aıtylǵan.
Alaıda ERG kompanııasy joba qaıta iske qosylǵan jaǵdaıda bul parametrlerdiń saqtalatynyn rastaǵan joq. Kompanııanyń málimetinshe, bolashaqtaǵy óndiristik qýat pen basqa da kórsetkishter tıisti sheshim qabyldanatyn sáttegi naryq syıymdylyǵyn eskere otyryp aıqyndalady, ıaǵnı buǵan deıin aıtylǵan joba parametrlerin endi túpkilikti dep esepteýge bolmaıdy.
Kelisimsharttyq bóligi de ózgerdi. Buǵan deıin Primetals Technologies jáne Midrex Technologies kompanııalarymen jasalǵan kelisimderdiń zańdy kúshi toqtatylǵan.
Eger ERG zaýyt qurylysyn qaıta bastaý týraly sheshim qabyldasa, eki kompanııamen de kelisimderdi qaıta jasaý qajet bolady. Degenmen kompanııa Primetals Technologies jáne Midrex Technologies-pen seriktestik baılanysyn saqtap otyrǵanyn málimdedi.
Qarjylandyrý máselesi keıin qaralady
Ystyq brıkettelgen temir óndiretin zaýyttyń qarjylandyrý shemasy da ázirshe anyqtalǵan joq. Bul másele jobany qaıta iske qosý týraly sheshim qabyldanǵanǵa deıin keıinge qaldyryldy.
Eske salaıyq, 2025 jylǵy qazanda ERG Rýdnyıdaǵy ystyq brıkettelgen temir óndiretin zaýytty salý jobasy aıasynda Primetals Technologies Austria GmbH jáne Midrex Technologies Inc. konsortsıýmymen strategııalyq kelisimge qol qoıǵan edi. Zaýyt Ortalyq Azııadaǵy «jasyl» metallýrgııa salasyndaǵy eń iri kásiporyndardyń birine aınalýǵa tıis edi.
Eske salaıyq, buǵan deıin Jańaózendegi «Qazaq gaz óńdeý zaýyty» JShS-ne ekologııalyq talaptardy buzǵany úshin 2 mln 378 myń 750 teńge kóleminde aıyppul salynǵanyn habarlaǵan edik.
