Rýdnyıda Tobyldan kóp mólsherde sý qabyldaýǵa daıyndyq júrip jatyr
ASTANA. KAZINFORM – Qostanaı oblysynda eki Qaratomar jáne Joǵarǵy Tobyl sý qoımalarynan sý aǵyzý bastalady. Sý basý qaýpi bar aımaqtar qataryna Rýdnyı qalasy da kirip otyr.
Tobyl-Torǵaı ınspektsııasynyń málimetinshe, Joǵarǵy Tobyl sý qoımasynyń naqty kólemi 750,76 mln m3 (92%). Qalypty deńgeıdegi kólemi – 816,6 mln m3. Erkin syıymdylyǵy – 65,84 mln m3. Qaratomar sý qoımasy 59 paıyz tolǵan. Joǵarǵy Tobyl jáne Qaratomar sý qoımalarynyń jalpy bos syıymdylyǵy 307,24 mln m3.
«Tobyl ózeni basseıni arqyly tasqyn sýlar aǵynynyń ulǵaıýyna baılanysty Joǵarǵy Tobyl sý qoımasynan sý 1000 m3/sek shyǵynmen shyǵarylady. Qaratomar sý qoımasynan 29 naýryzda saǵat 12-den bastap 70 m3/sek, 4 sáýirde saǵat 14-ten bastap 100 m3/sek aǵynmen sý jiberildi. Bul sý qoımasynyń joǵarǵy basseıninen tasqyn sýlarynyń erkin ótýine múmkindik jasaıdy», - dep habarlady Tobyl-Torǵaı ınspektsııasynan.
Biraq aımaq basshysy Qumar Aqsaqalov sońǵy ótken jıynda shekti núktege jetkende Qaratomar sý qoımasynan sý jiberile bastalatynyn, sekýndyna 250 tekshe metrden astam aǵyzylatyn sýdyń tómen ornalasqan eldi mekenderdi basý qaýpi bar ekenin aıtty. Pertsevka aýyly men Rýdnyı qalasynyń shetki kóshelerin, B.Maılın aýdanyndaǵy ıÝbıleınyı aýyly, Qostanaı qalasyndaǵy baý-baqsha qoǵamdary, Qostanaı aýdanyndaǵy Tobyl ózenine eń jaqyn aýmaqtardy sý basý qaýpi bar.
Osyǵan baılanysty Rýdnyı polıtseıleri halyqqa túsindirý jumystaryn júrgizip jatyr. Turǵyndarǵa evakýatsııa bolýy múmkin ekendigi eskertilip, saıajaı úıleri bar azamattarǵa jaǵdaı turaqtalǵansha qaýipti aımaqtan ketýge keńes berildi.
Elimizdiń birqatar oblystary sııaqty Qostanaı oblysy da sý tasqynyna tap boldy. Alǵashqylardyń qatarynda Arqalyq irgesindegi aýyldar sý astynda qalyp, Amangeldi aýylyn da sý basty. Arqalyq, Amangeldi jáne Jangeldi aýdandarynda 28 naýryzda tótenshe jaǵdaı jarııalandy.
