Rýdnyıda sot oryndaýshysyna pyshaqpen shabýyldaǵan er adam 15 jylǵa qamalatyn boldy
ASTANA. KAZINFORM — Qostanaı oblysy Rýdnyı qalasynyń turǵyny alıment óndirý týraly sot sheshimin oryndaǵan sot oryndaýshysyna pyshaqpen shabýyl jasaǵany úshin 15 jylǵa bas bostandyǵynan aıyryldy. Іs alqabılerdiń qatysýymen qaraldy.
Qylmystyq ister jónindegi mamandandyrylǵan aýdanaralyq sottyń málimetinshe, sottalýshy 2012 jyldan beri kámeletke tolmaǵan balalaryna alıment tóleýden jaltaryp kelgen. Sonyń saldarynan onyń bereshegi 9 mln teńgeden asqan.
Alıment óndirý týraly atqarýshylyq qujat sot oryndaýshysy H.-ǵa berilgennen keıin, ol bereshekti óndirip alý úshin zańda kózdelgen sharalardy qabyldaǵan.
2026 jylǵy aqpanda K. sot oryndaýshysynyń jumystan shyǵýyn ádeıi kútken. Keıin onyń kóliginiń ishinde shabýyl jasap, pyshaqpen moıny men betine tórt ret soqqy jasaǵan.
Shabýyl kezinde pyshaqtyń júzi synyp qalǵan. Sot oryndaýshysy qarsylyq kórsetip, kólikten shyǵyp, kómekke shaqyrǵan. Sottalýshy oqıǵa ornynan qashyp ketken.
Shabýyl saldarynan jábirlenýshiniń beti, betsúıek aımaǵy jáne sol jaq bilegi jaraqattanǵan.
Sotta K. ózine taǵylǵan aıypty moıyndamaǵan. Prokýror oǵan 16 jyl bas bostandyǵynan aıyrýdy suraǵan.
— Alqabıler soty K.-ny QR Qylmystyq kodeksiniń 408-baby boıynsha kináli dep tanyp, 15 jylǵa bas bostandyǵynan aıyrdy. Ol jazasyn ortasha qaýipsizdik mekemesinde óteıdi. Sonymen qatar sottalýshydan jábirlenýshiniń paıdasyna moraldyq zııan, materıaldyq zalal jáne ókildik shyǵyndar óndirildi. Úkim zańdy kúshine engen joq, — delingen habarlamada.
