Rýdnyıda salmaǵy bes keliden asatyn qyz bala dúnıege keldi
ASTANA. KAZINFORM — Rýdnyı qalalyq kópsalaly aýrýhanasynyń perınataldyq ortalyǵynda salmaǵy 5 keli 190 gramm qyz bala dúnıege keldi. Bul jyl basynan beri tórtinshi úlken náreste.
Lıaısan esimdi sábı 10 sáýirde dúnıege kelgen. Týǵan kezde onyń salmaǵy 5 keli 190 gramm, boıy 55 santımetr bolǵan.
Bul Rýdnyı qalasynyń turǵyny Indıranyń ekinshi balasy. Tuńǵyshy 3 keli 100 gramm salmaqpen dúnıege kelgen. Dárigerlerdiń aıtýynsha, qyz ben anasynyń jaǵdaıy jaqsy.
— Men 37-aptada ÝDZ-ǵa tústim, olar balanyń salmaǵy shamamen 3700 gramm dep eseptedi. Árıne, 41 aptada náreste 5 kelige deıin ósken kezde qatty tań qaldym. Qyzymnyń da, meniń de jaǵdaıym jaqsy. Esimdi joldasym ekeýmiz birge tańdadyq — bizge Lıaısan esimi unady, deıdi náresteniń anasy.
Osymen Rýdnyı qalalyq kópsalaly aýrýhanasynyń perınataldyq ortalyǵynda jyl basynan beri salmaǵy 5 keliden asatyn tórtinshi náreste dúnıege kelip otyr.
Buǵan deıin Túrkistan oblysynda salmaǵy 6 keli 15 gramm, boıy 63 sm alyp sábı ómirge keldi.
