Rýdnyıda salmaǵy 6 kelige jýyq alyp sábı dúnıege keldi

QOSTANAI. KAZINFORM – Rýdnyı qalalyq kópsalaly aýrýhanasynyń perınataldyq ortalyǵynda salmaǵy 5 900 gramm ul bala dúnıege keldi, dep habarlaıdy Kazinform-nyń menshikti tilshisi.

Baspasóz qyzmetiniń habarlaýynsha, náreste 15 qańtarda dúnıege kelgen. Onyń salmaǵy – 5 900 gramm, boıy 59 sm boldy. Ul balaǵa Elızar esimi berildi. Qazirgi kezde anasy Alena Dızına ekeýiniń jaǵdaıy jaqsy. 

Bosaný hırýrgııalyq jolmen ótti. Jańa týǵan náreste perzenthanadan shyǵar aldynda kúsh-qýat jınap jatyr. Júktiliginiń 40 aptasynda anasy Jitiqara aýdandyq aýrýhanasynan Rýdnyı perınataldy ortalyǵyna jiberildi. 

- Maǵan ishtegi balamnyń úlken ekenin aıtty. Biraq Rýdnyıda náresteniń salmaǵy 5 keliden áldeqaıda joǵary ekeni anyqtaldy. Árıne, ózim de, aınaladaǵylardyń bári de tańǵaldy. Úlken qyzym dúnıege kelgende salmaǵy 3,5 kg boldy. Birinshi bosanýym tabıǵı jolmen ótti. Ul balamdy bosanarda kesar tiligin jasadyq. Qazir bári jaqsy, endi úıge qaıtqymyz kelip otyr, - dedi jańa týǵan batyrdyń anasy. 

Dárigerler ota jasaý týraly sheshim ana men balanyń qaýipsizdigi úshin qabyldanǵanyn aıtty. 

- Jitiqarada ÝDZ dárigeri náresteniń salmaǵy 5 700 gramm dep anyqtap, birneshe ret tekserdi. Ýltradybystyq apparat 600-700 gramm qate kórsetýi múmkin, biraq naýqasqa josparly túrde ota jasaý týraly sheshim qabyldandy. Áıel qoryqty, ýaıymdady, biraq ózin sabyrly ustady jáne bizge sendi. Abyroı bolǵanda ota sátti aıaqtaldy. Balaǵa qarqyndy terapııa qajet bolǵan joq, biz tekserý júrgizdik. Qant deńgeıi qalypty, anasy júktilik kezinde qant dıabetimen aýyrmaǵan, tek isiný bolǵan, keıde qan qysymy kóterilgen. Qazirgi kezde ana men bala ózderin jaqsy sezinedi. Bul jerde jumys istep júrgenime kóp bolǵan joq. Alaıda eńbek tájirıbemde mundaı úlken náresteni birinshi ret kórip turmyn. Kólemi jaǵynan basqa sábılerden erekshelenetinin ańǵarýǵa bolady. Tipti maǵan ol birneshe aptadan keıin sóılep ketetin sııaqty kórinedi, - dedi dáriger Aıakóz Sydyqbaeva. 

Buǵan deıin Jambyl oblysynda salmaǵy 6 keliden asatyn sábı ómirge keldi.