Rýdnyıda qaıtys bolǵan áıeldi emhanaǵa tekserilýge shaqyrǵan
RÝDNYI. KAZINFORM — Rýdnyı qalasynda qala turǵynynyń anasynyń atyna flıýorografııaǵa shaqyrtý kelgen, alaıda onyń anasy bir jyl buryn qaıtys bolǵan.
Rýdnyı qalasynda qaıtys bolǵan áıeldiń atyna flıýorografııadan ótýge shaqyrtý kelgen oqıǵaǵa qatysty jaǵdaı naqtylandy.
Oqıǵa bir kún buryn bolǵan: qyzdyń aıtýynsha, oǵan messendjer arqyly emhana qyzmetkeri jazyp, anasyna flıýorografııadan ótý qajet ekenin habarlaǵan. Qaıtys bolǵan adamnyń qyzy bul habarlama ony qatty kúızeliske túsirgenin aıtty.
— Bul moraldyq turǵydan óte aýyr jaǵdaı. Men anamnyń qaıtys bolýyn áli de qıyn qabyldaımyn, al onyń atyna emhanadan osyndaı shaqyrtý alý — úlken qatygezdik sııaqty kórinedi, — dedi ol.
Ol emhanaǵa anasynyń 2024 jyldyń maýsymynda qaıtys bolǵanyn rastaıtyn qujattardy usynǵan.
Redaktsııa Rýdnyı qalasyndaǵy № 2 emhanaǵa suraý joldady.
Emhananyń túsindirýinshe, naýqas 2025 jyly qaıtys bolǵan. Qaıtys bolǵan kúni RPN (Tirkelgen halyq regıstri) júıesinde ólim týraly anyqtama engizilip, onyń mártebesi «qaıtys bolǵan» dep ózgertilgen. Alaıda KMIS «Damýmed» júıesimen sınhrondaý kezinde tehnıkalyq aqaýlar bolyp, aqparat ýaqytynda berilmegen. Sonyń saldarynan patsıent júıede tiri retinde kórsetilip, ýchaskelik meıirbıke skrınıngke shaqyrtý jibergen.
Keıin derekter qolmen jańartylyp, mártebe túzetilgen. Emhana mundaı jaǵdaılardyń aldyn alý úshin júıelerdi tekserip, derekterdi qolmen jańartyp otyratynyn jáne týystarymen túsindirý jumystary júrgizilgenin habarlady.
Aıta keteıik, Pavlodar qalasynyń prokýrorlary halyqqa medıtsınalyq kómek kórsetýge arnalǵan «Áleýmettik medıtsınalyq saqtandyrý qory» KEAQ-tyń bıýdjet qarajaty men aktıvteriniń jumsalýyna júrgizilgen tekserý barysynda jalǵan qyzmet kórsetý faktilerin anyqtady.
