Rýdnyıda gaz ben sý óshiriledi
QOSTANAI. KAZINFORM — Rýdnyı qalasynda 2021 jylǵy jaǵdaı qaıtalanýy múmkin – 11 tamyzdan bastap qalada turmystyq tutynýshylarǵa gaz berý ýaqytsha toqtatylady, dep habarlaıdy Kazinform agenttiginiń tilshisi.
Bul týraly «QAZAQGAZ AIMAQ» AQ KPF Rýdnyı gaz sharýashylyǵynyń dırektory Asylbek Sartaev málimdedi. Sebebi — «Intergaz Ortalyq Azııa» AQ 1–15 tamyz aralyǵynda magıstraldy gaz qubyryna josparly jóndeý jumystaryn júrgizbek.
1 tamyzdan bastap kommýnaldyq jáne óndiristik kásiporyndar gazsyz qalady, al 11 tamyzdan bastap Rýdnyıdyń gaz taratý stansasy (GRS) óshiriledi. Bul degenimiz — turǵyn úı sektoryna da gaz berý toqtaıdy.
— Qubyrdaǵy gaz qory taýsylǵansha, qala kezeń-kezeńimen gazdan ajyratylady. Tájirıbege súıensek, gaz bir kúnge ǵana jetedi. Turǵyndarǵa ótinish: eger plıtadaǵy ot janbasa, gaz qubyrynyń shúmegin jaýyp qoıyńyzdar, — dedi A. Sartaev.
15 tamyzdan bastap gaz qubyryn tazalaý jáne qaıta toltyrý jumystary bastalady. Bul protsess 3–4 kúnge sozylady, sodan keıin tutynýshylardy kezeń-kezeńimen qaıta qosý josparlanyp otyr. Alaıda gaz berý naqty qashan qaıta bastalatyny ázirge belgisiz — bári tehnıkalyq jaǵdaı men jumys kólemine baılanysty bolady.
Sonymen qatar, gazdyń bolmaýyna baılanysty Rýdnyı JEO-nyń jumysy toqtatylýy múmkin, bul óz kezeginde ystyq sý berýde de úzilister týǵyzýy yqtımal.
Turǵyndardan ýaqytsha qolaısyzdyqtarǵa aldyn ala daıyn bolý jáne qajet bolǵan jaǵdaıda balamaly jylytý men tamaq daıyndaý quraldaryn qoldaný suralady.
Buǵan deıin Shymkentte aptap ystyq saldarynan elektr jelileri isten shyqqan edi.