Rýdnyıda birneshe jerde jylý trassasy jaryldy

QOSTANAI. KAZINFORM — Jarylys ornynan túsirilgen vıdeo áleýmettik jelide tarap ketti. Apattyń túnde bolǵany habarlandy. Rýdnyı qalasynyń ákimdigi barlyq abonent qazirdiń ózinde jylý júıesine qosylǵan dep sendirdi, dep habarlaıdy Kazinform menshikti tilshisi.

Oqıǵa 2024 jyldyń 8 qarashasynda bolǵan. Shamamen saǵat 02.00-de Rýdnyı qalasynyń Toporkov kóshesindegi jeke sektorda dıametri 219 mm kvartalishilik taratý qubyry jarylǵan. Jeke sektordaǵy 198 úı jylýdan ajyratyldy. Saǵat 8:30-da búlingen jer jóndelip, qubyr iske qosyldy. Ákimdiktiń habarlaýynsha, qazirdiń ózinde qala turǵyndarynyń úılerinde jylý paıda bolǵan.

Taǵy bir apat jaǵdaıy tańǵy saǵat alty shamasynda oryn aldy. Onda Stroıtelnaıa kóshesindegi qubyrǵa zaqym keldi. Jeke sektordaǵy 27 úı jylýdan ajyratyldy. Qubyrdyń buzylǵan jeri bir-eki saǵattyń ishinde jóndelip, saǵat 12:00-ge deıin jylý beriletini habarlandy. Ákimdik bul qubyrlar magıstraldyq qubyr emes ekenin málimdedi. Bul aımaqtarda buryn jóndeý jumystary júrgizilmegen.

Rýdnyı qalasyndaǵy kvartalishilik jelilerdiń jalpy uzyndyǵy 140 km, onyń ishinde jeke sektordaǵy taratý jelileri — 44 km.

Jalpy, sońǵy 2 jylda Rýdnyı qalasynda jalpy somasy 16,5 mlrd teńgeden astam somaǵa 33,8 shaqyrym jylý jelilerine jóndeý jumystary júrgizildi.

Júrgizilgen jumystardyń nátıjesinde magıstraldyq jelilerdegi jalpy tozý 40,3%-dan 31,4%-ǵa, toqsandyq jeliler boıynsha 71,9%-dan 65,9%-ǵa deıin tómendedi.