Rýdnyı JEO-nyń qýattylyǵy 30 MVt-qa artady
ASTANA. KAZINFORM – Bıyl Rýdnyı JEO-da bir qazandyq agregaty men eki týrboagregatty kúrdeli jóndeý júrgizý josparlanǵan. Bul týraly Energetıka mınıstrliginiń baspasóz qyzmeti habarlady.
Jylytý maýsymynyń ótýine baqylaý jáne aldaǵy jóndeý naýqanyna daıyndyq aıasynda Energetıka mınıstrliginiń Memlekettik energetıkalyq qadaǵalaý jáne baqylaý komıtetiniń tóraǵasy Erjan Ertaev Qostanaı oblysyndaǵy energetıkalyq obektilerdi aralady.
Komıtet tóraǵasy Rýdnyı JEO-daǵy qaıta jańǵyrtý jumystarynyń barysymen tanysty.
Qazir № 1 qazandyqtyń montajy aıaqtalýǵa jaqyn, № 3 týrbınanyń generatoryn aýystyrý jumystary júrgizilýde. Qazandyq boıynsha montaj jumystaryn 30 naýryzǵa deıin aıaqtaý josparlanǵan, sáýir–maýsym aılarynda iske qosý-retteý jumystary júrgiziledi. Qazandyqty iske qosý stantsııanyń qolda bar qýatyn 30 MVt-qa arttyrýǵa múmkindik beredi. № 3 týrbına boıynsha QHR-dan jańa generator jetkizilgen, ony montajdaý jumystaryn tamyzǵa deıin aıaqtaý josparlanyp otyr.
Bıyl Rýdnyı JEO-da bir qazandyq agregaty men eki týrboagregatty kúrdeli jóndeý júrgizý josparlanǵan.
Sondaı-aq komıtet tóraǵasy «KEGOC» AQ Sarybaı MES dıspetcherlik ortalyǵynda bolyp, óńirdiń energııa júıesiniń jedel syzbasymen, josparlanǵan jóndeý jumystarymen jáne sý tasqyny kezeńine daıyndyq sharalarymen tanysty.
Jumys sapary aıasynda oblys ákimdigi ókilderiniń jáne óńirdegi energetıkalyq kásiporyndary — Qostanaı TEK, Arqalyq JEO, Rýdnyı JEO, Rýdnyı jylý jelileri, EPK-Forfait jáne Mejregıonenergotranzıt basshylarynyń qatysýymen keńes ótti. Keńeste problemalyq máseleler qaralyp, kásiporyn basshylarynyń baıandamalary tyńdaldy.
Energetıkalyq obektilerdiń sý tasqyny kezeńine daıyndyǵy jáne tıisti is-sharalardy iske asyrý máselelerine erekshe nazar aýdaryldy.
— Jylytý maýsymynyń turaqty aıaqtalýyn qamtamasyz etý jáne energetıkalyq obektilerdi aldaǵy jóndeý naýqanyna ýaqtyly daıyndaý mańyzdy. Barlyq jumystar belgilengen merzimde jáne energııa júıesiniń qaýipsizdigi talaptaryn saqtaı otyryp júrgizilýi tıis. Bul óńirlerdi turaqty energııamen qamtamasyz etýge tikeleı áser etedi, — dep atap ótti Erjan Ertaev.
Komıtettiń Qostanaı oblysy boıynsha aýmaqtyq departamentine jylytý maýsymynyń ótýin, jóndeý naýqanyna daıyndyqty jáne sý tasqynyna qarsy is-sharalardyń iske asyrylýyn turaqty baqylaýda ustaý tapsyryldy.
Aıta ketelik qaı óńirlerde JEO kúrdeli jóndeýden ótetini týraly jazǵan edik.
