Rýbldiń aýytqýynyń teńgege yqpalyn tómendetý úshin Ulttyq Bank valıýtalyq ınterventsııalar júrgizbek
2022 jylǵy 26 aqpanda Aq úı Eýropalyq komıssııa, Frantsııa, Germanııa, Italııa, Ulybrıtanııa, Kanada jáne AQSh kóshbasshylarynyń Reseıge qatysty budan bylaıǵy shekteýli ekonomıkalyq sharalar týraly birlesken málimdemesin jarııalady. Atap aıtqanda, sharalar Reseıdiń jekelegen bankterin SWIFT habarlarymen almasý júıesinen alyp tastaýdy jáne basqa shekteý sharalaryn, onyń ishinde Reseıdiń Ortalyq bankine qatysty shekteý sharalaryn engizýdi kózdeıdi.
Sonymen qosa, S&P Global Ratings reıtıngtik agenttigi halyqaralyq sanktsııalar engizilgennen keıin Reseıdiń uzaq merzimdi reıtıngin ınvestıtsııalyq emes reıtıng deńgeıine (BB+) deıin tómendetti.
Ulttyq Bank naqty ýaqyt rejıminde elder Úkimetteriniń, Ortalyq bankteri men qarjy uıymdarynyń resmı málimdemelerin qadaǵalap otyrady jáne Reseıge qarsy jańa sanktsııalardyń Qazaqstannyń qarjy júıesine yqpal etý dárejesin baǵalaıdy.
Aldaǵy kúnderi Reseı rýbliniń baǵamy aıtarlyqtaı qubylmalylyqpen sıpattalady jáne kóp jaǵdaıda naryq yqpalyna jáne táýekel-sentımenttiń ózgerýine ushyrap, az dárejede irgeli faktorlardy kórsetetin bolady.
Rýbldiń shamadan tys aýytqýynyń teńgege negizsiz yqpal etýin tómendetý úshin Ulttyq Bank qajet bolǵan jaǵdaıda valıýtalyq ınterventsııalar júrgizetin bolady. Mundaı ınterventsııalardyń kólemi men jıiligi ishki valıýta naryǵyndaǵy jaǵdaıǵa baılanysty bolady. Bul rette teńgeniń ıkemdi baǵamy syrtqy sektor tarapynan táýekelderdi iske asyrý aıasynda mańyzdylyǵy artqan altyn-valıýta aktıvteriniń saqtalýyn qamtamasyz etýge múmkindik beredi. Altyn-valıýta aktıvteriniń aǵymdaǵy deńgeıi ımporttyń 8,8 aıyn qantamasyz etýge múmkindik beredi.
Transparenttilik qaǵıdaty aıasynda Ulttyq Bank júrgizilgen operatsııalardyń kólemin jarııalaıdy. Syrtqy naryqtardaǵy ahýaldyń damýyna qaraı Ulttyq Bank ashyq kommýnıkatsııalardy júrgizýdi jalǵastyrady.