Rýbıo men Vals Ýkraınadaǵy atysty toqtatý týraly kelissózder júrgizý úshin Taıaý Shyǵysqa oralady
ASTANA. KAZINFORM — Jıddadaǵy kelissózde Amerıka ákimshiliginiń ókilderi atysty toqtatýǵa qatysty negizgi málimetterge toqtalady, dep habarlaıdy Kazinform tilshisi.
AQSh Memlekettik hatshysy Marko Rýbıo men Ulttyq qaýipsizdik jónindegi keńesshi Maık Valts kelesi aptada Reseıdiń Ýkraınaǵa qarsy soǵysynda atysty toqtatý týraly kelissózder júrgizý úshin Saýd Arabııasyna barady, dep habarlady AQSh prezıdenti Donald Tramptyń arnaıy ókili Stıven Vıtkoff Fox News arnasyna.
Tramptyń Reseı prezıdenti Vladımır Pýtınmen telefon arqyly kelissóz júrgizgennen keıin birneshe saǵat ótkende Vıtkoff bitim kelissózderi jeksenbi, 23 naýryzda Saýd Arabııasynyń Jıdda qalasynda jalǵasatynyn aıtty.
Vals pen Rýbıonyń talqylaýy atysty toqtatýǵa qatysty negizgi málimetterge arnalady. Vıtkoff AQSh delegatsııasynyń kimmen kezdesetinin naqtylamady, al Ýkraınanyń kelissózge qatysatyny belgisiz.
Qara teńizdegi energetıkalyq ınfraqurylymdar men nysandarǵa shabýyldardyń toqtatylýy múmkin ekendigine túsinikteme berdi.
— Meniń oıymsha, reseılikter osy eki tarmaq boıynsha kelisimdi maquldap otyr. Ýkraına jaǵy da bul sharttardy qabyldaıdy dep úmittenemin, — dedi Vıtkoff.
Ol osy sátten bastap atysty túbegeıli toqtatýǵa az ǵana ýaqyt qalǵanyn aıtty.
— Sońǵy ýaqytqa deıin bizde bul eki aspektide konsensýs bolǵan joq — energetıka jáne ınfraqurylym salasyndaǵy atysty toqtatý jáne Qara teńizde atqylaýǵa moratorıı — biraq búgin biz buǵan jettik jáne meniń oıymsha, bul jerden tolyq atysty toqtatý óte jaqyn, — dedi Vıtkoff efırde.
Sársenbi kúni Ýkraına Reseıdi AQSh qoldaǵan bitimgershilik usynysynan is júzinde bas tartty dep aıyptap, Máskeý energetıkalyq jelige shabýyldardy toqtatýǵa kelisim bergennen keıin birneshe saǵat ótken soń azamattyq ınfraqurylymǵa jappaı shabýyldar týraly habarlady.
Al Reseı Krasnodar ólkesindegi Kavkazskaıa aýyly mańyndaǵy munaı bazasynda ótken túnde ýkraındyq ushqyshsyz ushaqtyń shabýyly saldarynan shaǵyn órt shyqqanyn habarlady.
Eske sala keteıik, Pýtın men Tramp telefon arqyly kelissóz júrgizdi.
Prezıdentter Ýkraına aımaǵynda qalyptasqan jaǵdaı týraly pikir almasty.
Habarlamada Pýtın Donald Tramptyń 30 kúndik energetıkalyq ınfraqurylymǵa shabýyl jasamaý jónindegi bastamasyna qoldaý bildirip, birden áskerge tıisti buıryq bergeni aıtyldy.
Qasym-Jomart Toqaev AQSh pen Reseı prezıdentteri kelissóziniń qorytyndysyn quptaıdy.