Rýbıo men Ýıtkoff Ýkraına kelissózin talqylaý úshin Parıjge barady

ASTANA. KAZINFORM — Memlekettik hatshy Marko Rýbıo men arnaıy elshi Stıv Eıtkoff eýropalyq kóshbasshylarmen Reseı men Ýkraına arasyndaǵy soǵysty toqtatý máselesin talqylaý úshin Frantsııaǵa barady, dep habarlaıdy Kazinform menshikti tilshisi. 

— Memlekettik hatshy Marko Rýbıo men elshi Stıv Ýıtkoff prezıdent Donald Tramptyń Reseı-Ýkraına soǵysyn jáne qantógisti toqtatý maqsatyn alǵa ilgeriletý úshin eýropalyq áriptesterimen kelissóz júrgizý maqsatynda 16-18 sáýirde Parıjge (Frantsııa) barady. Parıjde ol aımaqtaǵy ortaq múddelerdi ilgeriletý joldaryn da talqylaıdy, — dep habarlady AQSh Memlekettik departamenti. 

Politico Europe habarlaýynsha,  Ýıtkoff Frantsııa prezıdenti Emmanıýel Makronmen, al Rýbıo — Frantsııa Syrtqy ister mınıstri Jan-Noel Barromen kezdesedi.

— Bul beıbit kelisim bes aýmaq dep atalatyn aımaqqa qatysty. Bul aýmaqtar - Qyrym, Donetsk, Lýgansk, Zaporoje jáne Herson oblystary bolýy múmkin, — dep málimdedi dúısenbide Ýıtkoff Fox News arnasyna. Bul týraly UPI habarlady. 

Bitim jasalǵan jaǵdaıda Frantsııa prezıdenti Kıevtiń qaýipsizdik kepildigin alǵanyn, onyń ishinde quramyna 30-ǵa jýyq el kiretin, altaýy óz áskerin berýge daıyn ekenin bildirgen «nıet bildirgender koalıtsııasy» qoldaýshy kúshteriniń Ýkraına aýmaǵynda ornalastyrylýyn qalaıdy.

Sársenbide Ýkraına prezıdenti Vladımır Zelenskıı bul ıdeıany qoldamaıtynyn málimdedi. 

— Bizdiń ustanymymyz naqty — ýaqytsha okkýpatsııalanǵan kez kelgen aýmaqty Ýkraına jerinen basqa dep tanýǵa – múlde jol berilmeıdi. Bul – biz úshin qyzyl syzyq, - dedi ol.

Kezdesýde AQSh pen Frantsııa ókilderi Iran men eki el arasyndaǵy saýda bajdaryn de talqylaıdy, dep jazdy Politico. 

Buǵan deıin Sankt-Peterbýrgte AQSh prezıdentiniń arnaıy ókili Stıv Ýıtkoff Reseı prezıdenti Vladımır Pýtınmen kezdeskenin jazǵan bolatynbyz.