Rýbıo: Izraıldiń Iranǵa jasaǵan soqqylaryna AQSh-tyń esh qatysy joq

ASTANA. KAZINFORM – AQSh Memlekettik hatshysy Izraıldiń Iranǵa qarsy jasaǵan soqqylaryn «birjaqty áreket» dep atap, oǵan Aq úıdiń qatysy joq ekenin málimdedi. Marko Rýbıo sondaı-aq Irandy aımaqtaǵy amerıkalyq kúshterge shabýyl jasamaýǵa shaqyrdy, dep jazdy DW.

— Búgin keshke Izraıl Iranǵa qarsy birjaqty áreket jasady. Biz bul soqqylarǵa qatyspaımyz, jáne bizdiń basty basymdyǵymyz — aımaqtaǵy amerıkalyq áskerılerdiń qaýipsizdigin qamtamasyz etý, — delingen Rýbıo málimdemesinde.

AQSh memlekettik hatshysynyń aıtýynsha, Izraıl Vashıngtonǵa bul áreketterin «ózin-ózi qorǵaý maqsatynda jasalǵan qajetti shara» retinde túsindirgen.

Izraıl Iranǵa qarsy operatsııa júrgizbek 

Izraıldiń Áskerı-áýe kúshteri 13 maýsymǵa qaraǵan túni Iranǵa qarsy aýqymdy áskerı operatsııany bastaǵan. Bul operatsııa Tegerannyń ıadrolyq baǵdarlamasyna qarsy baǵyttalǵan. The Times of Israel basylymynyń málimetinshe, Izraıl Qorǵanys armııasy (TsAHAL) Irannyń birneshe kún ishinde 15 ıadrolyq bomba jasaýǵa jetetin baıytylǵan ýrany bar ekenin jáne bul «qaýiptiń aldyn alý úshin shara qoldanýǵa májbúr bolǵanyn» málimdedi.

TsAHAL-dyń habarlaýynsha, Irandaǵy ondaǵan áskerı jáne ıadrolyq nysanǵa soqqy jasalǵan.

Izraıl premer-mınıstri Bınıamın Netanıahý:

— Biz Irannyń ıadrolyq otyndy baıytý baǵdarlamasynyń ózegine soqqy jasadyq. Sondaı-aq, ballıstıkalyq zymyran baǵdarlamasynyń basty elementterine de soqqy berdik, — dedi.

Sol ýaqytta Izraılde tótenshe jaǵdaı jarııalandy. Izraıldiń qorǵanys mınıstri Israel Kats:

— Jaqyn arada Izraıl memleketine jáne onyń beıbit halqyna zymyran jáne dron shabýyldary jasalýy múmkin, — dep málimdedi.

Eske sala keteıik, Izraıl Iranǵa soqqy berip, áýe keńistigin jaýyp tastaǵanyn jazǵan edik.

Taıaý Shyǵystaǵy jaǵdaıdyń ushyǵýyna baılanysty elshilik Izraıldegi Qazaqstan azamattaryna úndeý jasady.