Rýbıo Izraılde Qatarǵa jasalǵan soqqylardy aıyptady

ASTANA. KAZINFORM — AQSh memlekettik hatshysy Marko Rýbıo jeksenbi kúni Izraılge eki kúndik saparmen baryp, Gazadaǵy qaqtyǵystyń bolashaǵy men tutqyndardy bosatý máselesin talqylamaq, dep habarlaıdy BBC.

Rýbıo Izraıldiń Qatardaǵy HAMAS lıderlerine jasaǵan shabýylyna taǵy da narazylyq bildirdi, biraq bul oqıǵa eki el arasyndaǵy qarym-qatynastarǵa zııanyn tıgizbeıtinin, olardyń yntymaqtastyǵy áli de berik ekenin aıtty.

Dúısenbi kúni Qatarda arab-ıslam elderiniń shuǵyl sammıti ótip, aldaǵy áreketter talqylanady.

Rýbıo AQSh prezıdenti Donald Tramptyń barlyq ızraıldik tutqyndardyń bir mezgilde bosatylyp, HAMAS tolyq joıylýy kerek degen talabyn jetkizdi.

Memlekettik hatshynyń aıtýynsha, Vashıngton HAMAS toby ustap otyrǵan 48 tutqyndy bosatýdy, olardyń 20-sy áli tiri bolýy múmkin ekenin jáne Gazany qalpyna keltirý joldaryn talqylaǵysy keledi.

— Bolar is boldy. Biz Izraıl basshylyǵymen kezdesip, bolashaqqa qatysty sóılesemiz, — dedi Rýbıo sapar aldynda.

Ol Izraıldiń Gaza qalasyna shabýyldy qaıta bastaǵanyna qatysty pikir bildirýden bas tartty.

Sondaı-aq Rýbıo Izraıl premer-mınıstri Benıamın Netanıahý jáne AQSh-tyń Izraıldegi elshisi Maık Hakabımen birge arnaıy stellaǵa bardy.

Eske sala keteıik, 9 qyrkúıekte Izraıl Qatar astanasy Dohaǵa áýe soqqylaryn jasap, soqqy nysanasy HAMAS tobynyń saıası bıýrosynyń músheleri bolǵanyn málimdedi. Bul soqqylar saldarynan 6 adam qaza tapty. Olardyń arasynda toptyń bas kelissóz júrgizýshisi Halıl ál-Haııanyń uly jáne Qatar ІІM qyzmetkeri bar.

Qasym-Jomart Toqaev Izraıl bıliginiń Dohadaǵy áskerı áreketin aıyptady. Izraıldi Taıaý Shyǵystaǵy birneshe memleket te aıyptady, al Iordanııa koroli Izraıl soqqylaryna qarsy halyqaralyq mobılızatsııaǵa shaqyrdy.