Rýbıo Iran delegatsııasynan AQSh-tan ketýdi talap etti – BAQ
ASTANA. KAZINFORM — Vashıngton men Tegeran ırandyq dıplomattardyń Nıý-Iorkten ketýine qatysty qarama-qaıshy málimdemeler jasady, dep habarlaıdy Kazinform agenttiginiń menshikti tilshisi.
28 qyrkúıek kúni keshkisin AQSh Memlekettik hatshysy Marko Rýbıo syrtqy ister mınıstri Abbas Aragchı bastaǵan Iran delegatsııasynan elden dereý ketýdi talap etti.
Bul týraly beısenbi kúni Axios AQSh sheneýnigi men taǵy bir habardar derekkózge silteme jasaı otyryp habarlady. Irannyń BUU-daǵy ókildigi bul aqparatty joqqa shyǵardy.
Axios-tyń málimetinshe, Qatardyń araaǵaıyndyǵymen ótip jatqan Vashıngton men Tegeran arasyndaǵy kelissózder tyǵyryqqa tirelgennen keıin osyndaı talap qoıylǵan. Dúısenbi kúni tańerteń Aq úı áli de bolsa kelissózder alǵa jyljı ma dep úmittengen bolatyn, biraq keshke qaraı taraptar ymyraǵa kele almaǵany belgili boldy.
Osydan keıin BUU-daǵy AQSh ókildigi Rýbıonyń nusqaýy boıynsha Iran ókildigine delegatsııanyń ketýi qajettigin habarlady. AQSh sheneýnigi bul sheshimdi BUU Bas Assambleıasyndaǵy joǵary deńgeıdegi is-sharalardyń aıaqtalýymen túsindirdi. Basylymnyń málimetinshe, Aragchı men delegatsııanyń basqa músheleri birneshe saǵattan keıin áýejaıǵa attanyp, 29 qyrkúıek, seısenbi kúni 01:20-da Dohaǵa ushyp ketti. Axios-tyń ekinshi derekkózi AQSh talabyn rastaǵan, biraq ırandyq mınıstr onsyz da dúısenbi kúni keshke ketýdi josparlaǵanyn aıtty.
BUU-daǵy Iran ókildigi delegatsııa Nıý-Iorkten aldyn ala belgilengen keste boıynsha ketkenin málimdedi.
— Nátıjege qol jetkize almaǵan soń, Memlekettik departament negizsiz jáne paıdasyz habarlamalardy taratýǵa kóshti, — delingen mıssııanyń X áleýmettik jeli platformasyndaǵy málimdemesinde.
Sonymen qatar, AQSh pen Iran arasyndaǵy dıplomatııalyq baılanys úzilmegen. Axios-tyń málimetinshe, qatarlyq deldaldar eki tarappen de ymyraǵa kelý usynysyn talqylap jatyr.
Kelissózder barysynda Ormýz buǵazyn ashý, AQSh-tyń Iran porttaryna qoıǵan blokadasyn toqtatýy jáne Irannyń ıadrolyq baǵdarlamasyna qatysty sharttar basty taqyryp bolyp otyr.
Tegeran buǵan deıin talaptary oryndalǵan jaǵdaıda buǵazdy jeti kún ishinde ashý josparyn usynǵan bolatyn. AQSh prezıdenti Donald Tramp bul usynysty jarııaly túrde keri qaıtardy, biraq kelissózderdi jalǵastyrýǵa bolatynyn bildirgen.
Buǵan deıin Iran Ormýz buǵazyndaǵy keme qatynasynyń qashan jandanatyny AQSh-qa baılanysty ekenin málimdegen.
AQSh prezıdenti Donald Tramptyń aıtýynsha, amerıkalyq tarap Ormýz buǵazy arqyly rekordtyq kólemde munaı shyǵarǵan.
Abbas Aragchı Irannyń Ormýz buǵazyn ashý týraly usynysyna AQSh-tyń jaýaby seısenbiden keshikpeıdi dep úmit bildirgen bolatyn.
