Rýbıo: AQSh Aýǵanstan azamattaryna vıza berýdi toqtatty
ASTANA. KAZINFORM — AQSh bıligi Aýǵanstan azamattaryna vıza berýdi ýaqytsha toqtatty. Bul týraly X jelisinde memlekettik hatshy Marko Rýbıo habarlady.
«(AQSh prezıdenti Donald) Tramptyń Memlekettik departamenti aýǵan pasportymen júretin barlyq azamattarǵa vıza berýdi toqtatty. AQSh úshin óz elin jáne halyqty qorǵaý eshqandaı mindetten mańyzdy emes», dedi ol.
Buǵan deıin AQSh Azamattyq jáne ımmıgratsııalyq qyzmeti (USCIS) shetel azamattaryna bosqyn mártebesin berý ótinishterin ýaqytsha qaraýdy toqtatqan edi. Tramptyń aıtýynsha, onyń ákimshiligi elge kelgen bosqyndardy keri qaıtarýdy josparlap otyr jáne úshinshi elderden keletin adamdardy qabyldaý men ornalastyrýdy belgisiz merzimge toqtatady.
26 qarashada Vashıngton ortalyǵynda, admıral Devıd Farragýt alańynyń mańynda bir adam AQSh Ulttyq gvardııasynyń jaýyngerlerine qarsy oq atty. Oqıǵa ornynan Aq úıge deıingi qashyqtyq shamamen 300 metr. Shabýylshy men eki gvardııashy jaraqat alyp, aýrýhanaǵa jetkizildi. Keıin olardyń biri — áıel áskerı qyzmetker qaıtys boldy. Іshki qaýipsizdik mınıstri Krıstı Noem kúdiktiniń 2021 jyly AQSh áskeri Aýǵanstannan shyǵarylǵannan keıin odaqtastardy qabyldaý baǵdarlamasy boıynsha elge kelgenin málimdedi.
Eske sala ketsek, Aq úıdiń mańynda AQSh Ulttyq gvardııasynyń áskerı qyzmetkerlerine oq atylyp, polıtsııa kúdiktiniń ustalǵanyn habarlady.
Kóp uzamaı AQSh Ulttyq gvardııasynyń sarbazyna oq atqan kúdiktiniń jeke basy anyqtaldy. Kúdiktiniń esimi men túr-sıpaty 2021 jyldyń tamyz aıynda Aýǵanstannan AQSh-qa kóship kelgen er adamnyń jeke derekterimen sáıkes keledi.