Rýanda Prezıdenti Astanadaǵy forýmda eliniń tarıhyndaǵy genotsıd kezeńin eske aldy

ASTANA. KAZINFORM — Rýanda Respýblıkasynyń Prezıdenti Pol Kagame Astana halyqaralyq forýmynda qaýipsizdik máselesiniń memleketter damýyndaǵy róli týraly sóz qozǵady. 

— Qazaqstandaǵy baqýat — memlekettiń kúshti basshylyǵynan jáne damýdyń turaqtylyǵynan kórinis beredi. Bul forým dıalog úshin ǵana emes, álemdegi pragmatıkalyq yntymaqtyń ómirlik mańyzdy alańyna aınaldy, — bastady Rýanda basshysy.

Mártebeli meıman moderatordyń qoıǵan suraǵyna jaýap bere otyryp óz eliniń tarıhyn mysalǵa aldy.

— Biz áýelde óz tarıhymyzǵa arqa súıeımiz. Elimizde bolǵan genotsıdti eske alyńyz. Ózge elder bizde bolyp jatqan jaǵdaıǵa nazar aýdarmaı basqa jaqqa kóz tigip jatty. Biraq bul bizge ózge eldermen yntymaq ornatýǵa kedergi bolǵan joq. Dos peıildi elder men seriktesterimizden kóp qoldaý aldyq. Biraq bul árqaısymyz óz mindetimizdi oryndamasaq, sonshalyqty yqpal etip, paıdaly dúnıe bolmaýshy edi.

Biz ótken tájirıbemizden sabaq aldyq. Basqa elderden bolyp jatqan oqıǵalardan kez kelgen memlekettiń damýy úshin qaýipsizdik asa mańyzdy element ekenin ańǵaryp otyrmyz, — dedi Pol Kagame.

Sóziniń sońynda Rýanda basshysy Qazaqstanǵa AIF alańy arqyly ár tarap álemdik yqpaldastyqqa óz úlesin qosatyndaı múmkindik usynǵanyna alǵys aıtty.

Aıta keteıik, elordada Memleket basshysy Qasym-Jomart Toqaevtyń qatysýymen Astana halyqaralyq forýmy ótip jatyr. 

Forýmǵa 7 000-nan astam qatysýshy tirkelgen. Eýropa, Ortalyq Azııa, Taıaý Shyǵys pen Afrıka elinen BUU, AAU, HKU jáne DZMU sııaqty jetekshi halyqaralyq uıymdardyń atynan 160-tan astam spıker shaqyrylǵan. Eki kún boıy olar túrli salanyń sarapshylarymen birlesip, memleketaralyq yntymaqtastyq modelin, jańa jahandyq áriptestik qurýdyń keleshegin talqylaıdy.

Buǵan deıin forýmnyń mártebeli meımandar qatarynda Rýanda Respýblıkasynyń Prezıdenti Pol Kagamen, Albanııa Premer-Mınıstri Edı Ramany, Horvatııa Respýblıkasynyń Premer-Mınıstri Andreı Plenkovıchti, Qatar Premer-Mınıstri — Syrtqy ister mınıstri sheıh Muhammed ben Abdýlrahman Ál Tánı bar ekeni habarlanǵan bolatyn.