Rozaqul Halmýradov: 1 naýryz - Qazaqstanǵa eriksiz qonys aýdarǵan etnostardyń qazaq halqyna alǵys aıtatyn kúni
Mundaı pikirdi Qazaqstan halqy Assambleıasynyń múshesi Rozaqul Halmýradov bildirdi, dep habarlaıdy QazAqparat tilshisi.
«Qazaqstan halqy Assambleıasynyń 22-sessııasynda Assambleıa Tóraǵasy Nursultan Ábishuly Nazarbaev: «QHA qurylǵan kún – 1 naýryzdy jyl saıyn barlyq etnostardyń bir-birine meıirbandyq tanytyp, ózderin týysyndaı qabyldaǵan qazaq halqyna Alǵys aıtý kúni dep atasaq, bul kún barlyq etnos ókilderiniń dostyǵy men yntymaqtastyǵynyń jarqyn merekesi bolar edi» dep aıtqan bolatyn. Ony Assambleıa músheleri sóz sóıleý barysynda qyzý qoldady. Sonymen biz Alǵys aıtý kúnin 2016 jyldan beri 6 jyl qatarynan atap ótpekpiz.
Alǵys aıtý - taǵdyr tálkegimen Qazaqstan jerine eriksiz qonys aýdarylǵan túrli etnostyń myńdaǵan ókiliniń qutty qonysyna aınalǵan qazaq eline, jerine, óz baýyryndaı qabyldaǵan qazaq halqyna taǵzym etetin kúni. Qazaq halqy qansha qıynshylyq bolsa da, ózderine jetispeı jatsa da sol eriksiz qonystandyrylǵandardyń barlyǵyna jyly jaıyn berip, bir úzim nanymen bólisý arqyly qazaqtyń ata-babasynan kele jatqan qonaqjaılylyǵyn tanytqan bolatyn. Mine, soǵan eń aldymen taǵzym etip, alǵys aıtatyn kún», - dedi QHA múshesi.
Onyń atap ótýinshe, elimizde tynyshtyq pen beıbitshiliktiń, ózara senim men barlyq qazaqstandyqtarǵa degen qurmettiń oryn alýyna negiz bolǵan Elbasy Nursultan Nazarbaevtyń syndarly saıasatyn búginde QR Memleket basshysy Qasym-Jomart Toqaev jemisti júzege asyryp keledi.
«Sol sebepti biz el basshylaryna da rızashylyq bildirip, alǵys aıtamyz. El táýelsizdigin baıandy etý, ekonomıkasyn nyǵaıtý úshin aıanbaı ter tógip jatqan barlyq azamatqa úlken qurmet bildire otyryp, rızashylyǵymyzdy bildiremiz. Alǵys aıtý kúninde birge turyp jatqan otbasymyzǵa, aýyldastarymyzǵa, kórshilerimizge, árbir qazaqstandyqqa beıbit ómir súrip jatqanymyz úshin alǵys aıtamyz.
Qurmetti otandastar! Alǵys aıtý kúnine oraı Qazaqstandaǵy 130-dan astam etnos ókilderin qazaqtyń berekeli shańyraǵy astynda biriktirip turǵan QHA kúnimen de quttyqtap, barshańyzǵa alǵys aıtamyn. Ortaq úıimizdegi beıbitshilik pen jalpyulttyq kelisim úshin barshańyzǵa basymdy ıip, zor rızashylyǵymdy bildiremin. Elimiz tynysh, halqymyz aman bolsyn! Qazaqstannyń kók týy álem bıikterinde jelbireı bersin!», - dedi Rozaqul Halmýradov.
