Roza Jamanova ónersúıer qaýymnyń shynaıy súıispenshiligine bólengen dańqty ánshi
ALMATY. 30 jeltoqsan. QazAqparat - Halqymyzdyń dańqty qyzdarynyń biri Keńes Odaǵynyń jáne Qazaq KSR-niń halyq ártisi Roza Jamanovanyń ómirden ótkenine baılanysty aýyr qaıǵylaryńyzǵa ortaqtasyp, kóńil aıtamyn. Bul týraly búgin Almatyda óner sańlaǵyn aqtyq saparǵa shyǵaryp salý rásiminde QR Prezıdenti Nursultan Nazarbaev joldaǵan jedelhatta aıtyldy. Jedelhatty qala ákimi Ahmetjan Esimov oqyp berdi.
«Roza Úmbetqyzy óziniń búkil shyǵarmashylyq ǵumyryn Abaı atyndaǵy memlekettik opera jáne balet teatryna arnady. Ol otandyq jáne álemdik opera týyndylarynyń dańqty arııalaryn úlken sheberlikpen oryndap ádemi daýysymen, bıik mádenıetimen ónersúıer qaýymnyń shynaıy súıispenshiligine bólene bildi», - delingen jedelhatta. Óner sańlaǵynyń alystaǵy aýyldar men shetel sahnalarynda án shyrqaǵany, konservatorııa qabyrǵasynda shákirtterge dáris berip, laıyqty izbasarlar tárbıelegeni aıtylǵan. Sondaı-aq eńbegimen el qurmetine bólenip, Keńes Odaǵynyń jáne Qazaq KSR Joǵarǵy keńesiniń depýtaty bolyp saılanǵany, joǵary memlekettik nagradalarmen marapattalǵany aıtylyp, áıgili ánshiniń esimi men óneri árdaıym halqymyzben birge jasaı beretindigi atalyp ótilgen.
