Roza Rymbaevaǵa «Shyǵys Qazaqstan oblysynyń Qurmetti azamaty» ataǵy berildi
ÓSKEMEN. QazAqparat - Búgin Shyǵys Qazaqstan oblysynyń ákimi Danıal Ahmetov Qazaqstannyń halyq ártisi Roza Rymbaevaǵa «ShQO Qurmetti azamaty» tósbelgisin tabys etti, dep habarlaıdy QazAqparat.
«Búgin qýanyshty, ári tarıhı kún. Jańa jyl qarsańynda jerlesimiz, Qazaqstannyń halyq ártisi Roza Qýanyshqyzy Rymbaevaǵa «ShQO Qurmetti azamaty» ataǵyn jeke tapsyrýdamyn. Men úshin bul zor qurmet. Biz árdaıym jerlesterimizdiń jeńisi úshin qýanyp, qoldap júremiz», - dedi ShQO ákimi Danıal Ahmetov.
Kezdesý barysynda R.Rymbaeva Semeı qalasynda uly Abaıdyń 175 jyldyǵy aıasynda atqarylǵan jumystardyń aýqymyn joǵary baǵalap, jýyrda ǵana mereıtoıǵa arnalǵan qorytyndy kontsertte án shyrqaǵanyn eske aldy.
«Jyl saıyn ózimniń gastroldik saparymdy Shyǵys Qazaqstannan bastaýǵa tyrysamyn. Sebebi, týǵan ólkemnen erekshe shabyt, kúsh-qýat alamyn. Halqyma júrekpen án shyrqap, bir tolqynda óner kórsetemin. Búgingi marapat úshin halqyma zor alǵysymdy bildiremin», - dedi Roza Rymbaeva.
ShQO ákimdiginiń baspasóz qyzmetinen málim etkendeı, sondaı-aq Qazaqstannyń halyq ártisi Óskemendegi jańartylǵan «ERTIS CONCERT» ǵımaratynda boldy. Roza Rymbaeva aldaǵy jyly erekshe baǵdarlamamen kelip, oblys turǵyndaryna jeke kontsert berýge ýáde etti. Jospar boıynsha, kesh ShQO sımfonııalyq jáne halyq aspaptar orkestriniń súıemeldeýimen ótedi.
