Roza Rymbaeva «Jarma aýdanynyń Qurmetti azamaty» atandy
ASTANA. QazAqparat - Ánshi Roza Rymbaeva ózi dúnıege kelgen Jarma aýdanynyń halqyna arnap jeke kontsertin tegin ótkizdi, dep habarlaıdy «QazAqparat» HAA tilshisi ShQO Aqparattyq ortalyǵyna silteme jasap.
Bıyl alpysqa tolyp otyrǵan ánshi Shyǵys Qazaqstanda bastaý alǵan «Týǵan jer» baǵdarlamasy aıasynda Qalbataý aýylynda kontsertin ótkizdi. Ánshi jeke kontsertin jerlesteri úshin tegin ótkizgen. Búkil Qazaqstannyń maqtanyshyna aınalǵan ánshiniń kontserti kúni aýdandyq mádenıet úıine ıne shanshar oryn bolmady.
Kontsert barysynda Jarma aýdanynyń ákimi Nurlan Sydyqov Roza Rymbaevaǵa alǵysyn bildirip, ánshige «Jarma aýdanynyń Qurmetti azamaty» ataǵyn berdi. Óz kezeginde Roza Qýanyshqyzy týǵan eline zor alǵysyn bildirdi.
«Men ózim ómir esigin ashqan óńirge kelip, kontset bergenime shyn júrekten qýanyshtymyn. Munda bári ózgerip ketipti. Týǵan kúnimdi jerlesterimniń ortasynda toılap jatqanym úshin baqyttymyn»,- deıdi ánshi.
Aıta ketsek, Roza Rymbaeva qazaq estrada ánshisi, professor ári aktrısa, Qazaqstannyń halyq ártisi, Memlekettik syılyqtyń ıegeri, birneshe halyqaralyq konkýrstardyń laýreaty. Qurmet jáne Parasat ordenderiniń ıegeri. Qyrǵyzstannyń (2000) jáne Ózbekstannyń (1984) eńbek sińirgen ártisi. 1977-1979 jyldary «Pesnıa goda» festıvaliniń aqtyq saıysynda jáne KSRO-nyń eń úzdik «Zvýkovaıa dorojka» hıt-paradynda (1978 j. 3-orynda Alla Pýgacheva jáne Sofııa Rotarýdan keıin) joǵary orynnan kórinip, úlken tanymaldylyqqa ıe bolǵan.
