Roza Rymbaeva tuńǵysh ret Sh.Qaldaıaqovtyń án keshine qatyspaq
ASTANA.QazAqparat - Qazaq estradasynyń prımasy Roza Rymbaeva tuńǵysh ret elordadaǵy Shámshi Qaldaıaqovty eske alý án keshine qatysady. Bul týraly búgin Astana kúnine arnalǵan «Ánim sen ediń» kontsertiniń qarsańynda uıymdastyrylǵan baspasóz máslıhatynda ánshiniń ózi málim etti.
"Bıyl men Shámshi Qaldaıaqovtyń esimin eske alý keshine alǵash ret qatysqaly otyrmyn. Men úshin bul óte eleýli oqıǵa. Men Shámshi aǵamen 1975 jyly jas ónerpazdar baıqaýynda tanysqanmyn. Ol qazylar alqasynyń tóraǵasy edi. Men sol baıqaýda jeńimpaz atanyp, sodan beri sol kisimen aralasýym ornady deýge de bolady. Onyń shyǵarmasyn tuńǵysh ret "Murager" ansambliniń qatarynda júrip oryndaǵanmyn, bizdi tyńdaǵan Shámshi aǵa kóńilinen shyǵatyndyǵyn jetkizdi", - dep atap ótti ol.
Onyń aıtýynsha, Sh.Qaldaıaqovtyń ánderi qazaq halqynyń altyn murasyna aınaldy. "Bizdiń elde uly kompozıtordyń shyǵarmalaryn estimegen jan joq shyǵar. Kontsertke kelgen jamaǵat ol kisiniń ánderin birge qosylyp aıtady dep senemin, sebebi olar halyqtyń qulaǵynda júrgen tanymal ánder", - deıdi R.Rymbaeva.
4 shildede "Qazaqstan" kontsert zalynda ótetin keshte Sh.Qaldaıaqovtyń tanymal hıtterimen qatar, az shyrqalyp kelgen sırek ánderi de shyrqalmaq. Jalpy kompozıtordyń qorynda 300-den astam án bolǵan.
Qazaq valsi koroliniń shyǵarmalaryn oryndaýǵa Bıbigúl Tólegenova, Roza Rymbaeva, Álibek Dinishev, Medeý Arynbaev, Marjan Arapbaeva, Jubanysh Jeksenuly, Altynaı Jorabaeva, MýzArt toby, «KeshYou», «Rin'Go», «Melo'Men», sonymen qatar áıgili opera ánshileri Súndet Baıǵojın, Gúlzat Dáýirbaeva men Aıgúl Nııazova sahnaǵa shyǵady.
Aıta keteıik, Sh.Qaldaıaqovtyń án keshi 1992 jyldan beri ótkizilip keledi.
