Roza Rymbaeva, «MýzArt» pen «Báıterek» toptary, sondaı-aq, sheteldik oryndaýshylar Tuńǵysh Prezıdent kúni gala-kontsertiniń qonaqtary bolady
ASTANA. 22 qarasha. QazAqparat - Tuńǵysh Prezıdent kúnine arnalǵan is-sharalardyń negizgi túıini 1 jeltoqsanda «Qazaqstan» Ortalyq kontsert zalynda ótetin saltanatty gala-kontsert bolmaq.
Elordanyń resmı saıtynyń jazýynsha, «Sazgen sazy» orkestri men Qazaqstan Respýblıkasynyń eńbek sińirgen óner qaıratkeri Aleksandr Ablaev jetekshilik etetin «Astana» estradalyq-sımfonııalyq orkestriniń súıemeldeýimen Dostastyq elderi ártisteri men shyǵarmashylyq ujymy oryndaıtyn jan tebirenter ánder shyrqalady.
Kesh qonaqtary Moldova Respýblıkasynyń halyq ártisi Konstantın Moskovıch, qazaqstandyq estrada juldyzdary Roza Rymbaeva, «MýzArt», «Báıterek» toptary, Belarýstyń «Kamerata» ansambli, Omby qalasynan kelgen orystyń halyq hory, Ózbekstan men Qyrǵyzstannan kelgen halyqaralyq baıqaýlardyń laýreattary jáne basqa oryndaýshylar bolady.
