Roza Rymbaeva qazaqtyń batyr qyzy Álııa Moldaǵulovanyń týǵan jerine bardy
AQTÓBE. QazAqparat -Ánshi Roza Rymbaeva qazaqtyń batyr qyzy Álııa Moldaǵulovanyń týǵan jerine baryp, aǵash ekti, meshitke kirip, Quran baǵyshtady. Qobda aýdanynda tegin kontsert berdi, dep habarlaıdy QazAqparat tilshisi.
Aqtóbe oblysyna esep berý kontsertimen kelgen ánshi Roza Rymbaeva Keńes Odaǵynyń batyry Álııa Moldaǵulovanyń týǵan jeri Qobda aýdany, Bulaq aýylyna baryp, keıin Álııa aýylyndaǵy patrıottyq ortalyqta boldy. Ortalyqta qazaqtyń batyr qyzyna arnalǵan mýzeı jabdyqtalyp, balalar men jasóspirimderdiń sportpen shuǵyldanýyna jaǵdaı jasalǵan. Sol ortalyqta aýyl balalarymen, turǵyndarmen kezdesti. Keıin aýlaǵa aǵash ekti.
«Aýyl qarapaıym. Qarapaıymdylyǵymen de keremet. Biz sondyqtan da aýyldy ańsaımyz. Aýyldyń adamdarymen kezdesip, olardan qarapaıymdylyqty kórdim. Olarǵa ónerimizben ǵana jaýap bere alamyz»,- dedi ánshi Roza Rymbaeva.
Álııa aýylyndaǵy Álııa patrıottyq ortalyǵyna ózge óńirler men qalalardan, aýdannan oqýshylar men jastar, elimizge belgili adamdar jıi barady. Batyrlar elinde Qobylandy batyr, Abat Baıtaq, Isataı batyrdyń memorıaldyq kesheni men jerlengen jeri bar.
«Elimizdiń batys óńirinde tarıhı tulǵa kóp, halqy batyr. Óńirdiń ózi Eýropa men Azııanyń qıylysynda tur. Munda da mán men maǵyna bar»,- dedi Roza Rymbaeva.
Aýyl adamdarymen kezdesip, Qobda aýdanynyń tarıhı, mádenı oryndaryn aralaǵan ánshi Roza Rymbaeva aýdandyq mádenıet úıinde tegin kontsert qoıdy. Kontsertte halyqqa keń tanymal «Álııa» áni de oryndaldy.
