Roza Rymbaeva: Ernar Aıdar - ózbektiń ánin qazaqsha oryndap júrgen toıdyń ánshisi
ASTANA. QazAqparat - Ánshi Roza Rymbaeva «Vıtebsktegi Slavıan bazary» halyqaralyq óner festıvalinde Qazaqstannyń atynan shyǵatyn Ernar Sadyrbaevty taǵy bir ánshi Ernar Aıdarmen salystyrmaýdy ótindi. Ol týraly Qazaqstannyń halyq ártisi OKQ-da ótken baspasóz máslıhatynda aıtty, dep habarlaıdy QazAqparat tilshisi.
Baspasóz máslıhaty barysynda tilshilerdiń biri bıylǵy «Slavıan bazarynda» Qazaqstannyń namysyn qorǵaıtyn Ernar Sadyrbaevqa «Ernar Aıdardan keıin qanshalyqty tanymal bolamyn dep oılaısyz? Qoryqpaısyz ba?» degen suraq qoıdy.
Jıyn barysynda Ernar Sadyrbaev (án áleminde «Ámire» atymen belgili - avtor) bul suraqqa jaýap berýden bas tartyp, Roza Rymbaeva sóz tizginin ustady.
«Meniń oıymsha, ánshiniń atyn shyǵaratyn - ol onyń áni, shyǵarmashylyq óneri. Ernar Aıdar men «Ámireni» salystyrýǵa bolmaıdy. Men maman retinde aıtaıyn. Ernar Aıdar - ózbektiń nemese túriktiń ánderin qazaqsha oryndap júrgen toıdyń ánshisi. Al bizdiń myna balamyz - búgingi Ernar konkýrsqa qatysatyn ánshi. Konkýrsqa qatysý - óziniń deńgeıin halyqaralyq deńgeıde kórsetý, shyǵarmashylyǵyn sol formatqa sáıkes keletin halyqaralyq oryndaýshy jastarmen saıysqa túsý. Ondaı jastardyń arasynda saıysqa túsýdiń ózi - deńgeı. Al endi eger seniń shyǵarmań kem túspeı, artyq bolyp tursa - ol Qazaqstan mádenıetiniń deńgeıiniń joǵary bolǵandyǵy. Sondyqtan, ana Ernarmenen myna Ernardy salystyra almaımyn, keshirińizder», - dedi Roza Rymbaeva.
Aıta ketsek, Vıtebsktegi «Slavıan bazary» halyqaralyq óner festıvali Belarýs memleketin dúnıe júzine tanymal etti. 1995 jyldan bastap festıval Belarýs Respýblıkasynyń prezıdenti Aleksandr Lýkshenkonyń jeke qoldaýymen halyqtar arasynda mádenıet dıalogynyń qalyptasýyna yqpal etip keledi. Festıval kúnderi dástúrli túrde odaqtas memleketter kúni, Belarýs, Reseı, Ýkraına elderiniń óner ıeleriniń gala kontserti, «Shekarasyz festıval», «Teatr kezdesýleri», «Juldyzdy sát» baǵdarlamalary ótkiziledi.
Atalǵan festıvalde Qazaqstannyń Halyq ártisi Roza Rymbaeva men ánshi Dımash Qudaıbergen tórelik etetin bolady.
Aıta ketsek, Dımash Qudaıbergen 2015 jyly Vıtebskide ótken «Slavıan bazary» halyqaralyq án festıvalinde bas júldeni ıelengen bolatyn.
Foto: mtdata.ru
