Roza Rymbaeva Qytaıda baq synaıtyn Rýhııa Baıdúkenovaǵa sáttilik tiledi
ASTANA. KAZINFORM — Sahnada jarty ǵasyrlyq tájirıbesi bar Qazaqstannyń Halyq ártisi Roza Rymbaeva Jibek Joly telearnasyndaǵy «Búgin.LIVE» baǵdarlamasyna qonaqqa keldi. Suhbat barysynda ánshi bıyl Qytaıda ótetin halyqaralyq «Silk Way Star» jobasyna toqtalyp, Qazaqstan atynan qatysatyn Rýhııa Baıdúkenovaǵa qoldaý bildirdi. Kezinde Rýhııanyń úlken sahnalarǵa shyǵýyna jol ashqan prımadonna shákirtiniń vokaldyq qabiletine joǵary baǵa berip, aq batasyn berdi.
Roza Rymbaeva Rýhııa Baıdúkenovany shyǵarmashylyq jolynyń bastaýynan beri jaqsy tanıtynyn, tipti onyń «Slavıan bazary» baıqaýyna tańdalýyna tikeleı yqpal etkenin atap ótti. Halyq ártisiniń aıtýynsha, Rýhııanyń Qytaı sahnasynda baǵyn synaýy — zańdy qubylys.
— Men Rýhııany ánshi retinde óte joǵary baǵalaımyn. Ony «Slavıan bazary» tańdaý kezinde komıssııa múshesi retinde Rýhııa barýy kerek dep sheshim qabyldaǵan edim. Ol baryp, jeńip keldi. Endi, mine, Dımashtan keıin Qytaıda tájirıbe jınaqtap júr. Rýhııa — tabıǵattan úlken daryn berilgen ánshi, onyń dıapazony opera juldyzdarynan bir de kem emes. Sondyqtan onyń Qytaı halqyn tańǵaldyratynyna senemin, — dedi Roza Rymbaeva.
50 jyl boıy sahnanyń ystyq-sýyǵyn kórgen ánshi halyqaralyq baıqaýlarda tek vokal ǵana emes, tańdalǵan repertýardyń da mańyzy zor ekenin eskertti. Ol Rýhııanyń laýreattar qatarynan kórinetinine nyq senim bildirdi.
— Eń birinshi — oryndalatyn shyǵarma joǵary deńgeıde bolýy kerek. Eger ániń sapaly bolsa, qazylar alqasy men qatysýshylar seni qaı tilde aıtsań da moıyndaıdy. Rýhııanyń múmkindigi mol, ol Qazaqstandy jaqsy deńgeıde kórsete alady. Onyń Gran-prı nemese bıik laýreattyq dáreje ıelenetinine senimim mol, — dep aq tilegin jetkizdi.
Baǵdarlama barysynda ánshi Álı Oqapov ta Rýhııanyń repertýary durys tańdalsa, Qytaı elinde Dımashtan keıingi úlken jańalyq bolatynyn aıtty.
— Qytaı halqy tańǵalarlyq vokaldyq formatty jaqsy kóredi. Rýhııa dál sondaı formatta ózin kórsete alady, buǵan esh kúmán joq. Ol birden kórermenniń kózaıymyna aınalyp, tipti jeńimpaz bolýy ábden múmkin, — dedi Álı Oqapov.
Suhbat sońynda Roza Rymbaeva óziniń 17 mamyr kúni Astanada ótetin kontsertine de toqtalyp, onda talantty jastarmen dýet aıtý josparda bar ekenin jetkizdi.
Aıta keteıik, buǵan deıin Silk Way Star halyqaralyq vokaldyq baıqaýynyń jeńimpazy, Mońǵolııadan kelgen Mıshel Djozef qazaq tilinde án jazýdy josparlap júrgenin málimdegen edi.
