Roza Otynbaeva qyrǵyz úkimetine Qazaqstannan úlgi alýdy usyndy
ASTANA. QazAqparat - Qyrǵyzstannyń eks-prezıdenti Roza Otynbaeva óz eliniń úkimetine Qazaqstannan úlgi alýdy usyndy, dep habarlady KırTAG.
«Biz batys pen shyǵystan tájirıbe alýdy oılastyryp otyrmyz, al kórshimiz Qazaqstan bolsa, óte qyzyqty túrde damyp keledi», - dedi Roza Otynbaeva Qyrǵyzstan Respýblıkasy memlekettik organdary qoǵamdyq keńesiniń jyl saıynǵy konferentsııasynda.
«Qoǵamdyq keńester, mınıstrlikterdiń qyzmetkerlerine qaraǵanda sizderdiń bos ýaqyttaryńyz kóbirek. Sondyqtan keńes berińizder, kómektesińizder, oqyńyzdar, zertteńizder. Kórshi memlekette qandaı memlekettik qyzmet usynyp otyrǵanyn baıqańyzdar. Bizdiń qyrǵyzstandyqtar úshin nelikten osyndaı jaǵdaı jasamasqa. Almaty qalasynyń saıtynda ár azamat kez kelgen aqparatty taba alady. Onda jas ákimniń ómirbaıanynan bastap, nysandardyń syzbasy, ornalasqan jeriniń kestesine deıin jáne ózge de qyzmetterdi tabýǵa bolady», - dedi eks-prezıdent.
R.Otynbaeva qoǵamdyq keńesterdiń mindeti - mınıstrlikterdiń jumysynyń kontentin qurý, jańa jolǵa kóshýine kómektesý ekenin atap ótti.
