Roza Otynbaeva: eger partııalar qysqa merzimniń ishinde úkimetti jasaqtaı alsa, halyq olarǵa rıza bolady
BІShKEK. Qazannyń 28-i. QazAqparat /Arnur Rahymbekov/ - Qyrǵyz Respýblıkasynyń Prezıdenti Roza Otynbaeva óz beınekúndeliginde Jogorký Keneshtiń quramyna kirýi múmkin birqatar saıası partııalardyń jetekshilerimen bolǵan kezdesýdiń qorytyndysy týraly áńgimelep berdi. Prezıdent eldegi aǵymdaǵy saıası ahýalǵa qysqasha toqtalyp ótti.
R.Otynbaeva aǵymdaǵy aptanyń basynda birqatar saıası partııalardyń jetekshilerimen - Ómirbek Tekebaevpen, Ómirbek Babanovpen, Qamshybek Tashıevpen jáne Felıks Qulovpen kezdeskenin habarlady. Kezdesýge sondaı-aq Qyrǵyz Prezıdenti ákimshiliginiń jetekshisi Emılbek Qaptaǵaev pen Ortalyq saılaý komıssııasynyń tóraǵasy Aqylbek Sarıev qatysqan.
Saıası partııalardyń jetekshilerimen bolǵan kezdesý syndarly mazmunda ótkenin jetkizgen R.Otynbaevanyń aıtýynsha, qatysýshylar aǵymdaǵy aptanyń sońynda parlamenttik saılaýdyń qorytyndysy málim bolatyndyǵy jaıly habardar etilgen.
Parlamenttik kópshiliktiń jasaqtalýy týraly máselege toqtalǵan Qyrǵyz Prezıdenti, bul jerde túrli varıanttardyń bolý múmkindigin alǵa tartty. Dástúr boıynsha, ol mandat eń kóp daýys alǵan partııaǵa beriledi. Nemese parlamenttiń jumysy bastalǵanǵa deıin kópshilik koalıtsııasy anyqtalsa, onda basqa partııany tańdaýǵa bolady, deıdi R.Otynbaeva.
Qyrǵyz Respýblıkasynyń Prezıdenti óz sózinde sondaı-aq, eger partııalar qysqa merzimniń ishinde úkimetti jasaqtaı alsa, halyq olarǵa rıza bolatynyn aıtty.
