Roza Muqanovanyń shyǵarmashylyǵyna arnalǵan «Teatr All» halyqaralyq festıvali máresine jetti
ASTANA. KAZINFORM – Astana qalasynda 28 qazan men 3 qarasha aralyǵynda ótken Abaı atyndaǵy memlekettik syılyqtyń laýreaty, Qazaqstannyń eńbek sińirgen qaıratkeri, jazýshy-dramatýrg Roza Muqanovanyń dramatýrgııasyna arnalǵan «TEATR ALL» III halyqaralyq teatr festıvali aıaqtaldy.
Kórermenderdi jazýshy-dramatýrg Roza Muqanovanyń shyǵarmashylyǵymen tanystyrý, halyqaralyq shyǵarmashylyq baılanystardy nyǵaıtý jáne teatr ónerine jańa serpin berip óskeleń urpaqqa keńinen nasıhattaý baǵytyndaǵy festıvaldiń qorytyndysy men júlde qoryna toqtala keteıik:
- «Úzdik qoıylym» – «Farıza» dramasy (rejısseri Farhad Moldaǵalı) Túrkistan mýzykalyq drama teatry (1 000 000 teńge).
- «Úzdik rejıssýra» – Arnıs Kydyrmyshev («Jesir» dramasy) Jamal Seıdakmatova atyndaǵy «Týngých» jastar teatry (Qyrǵyz Respýblıkasy, Bishkek qalasy) (1 000 000 teńge).
- «Úzdik akterlik ansambl» – «Qyzjylaǵan» dramasy (rejısseri - A.Maksım), Astana qalasy ákimdiginiń Mýzykalyq jas kórermen teatry (500 000 teńge).
- «Úzdik er adam beınesi» – «Shatyr astyndaǵy Men» spektaklindegi Antı Shrek róli úshin Hazar Gıandjalı, Gazah memlekettik drama teatry (Ázerbaıjan Respýblıkasy, Gazah qalasy) (500 000 teńge).
- «Úzdik áıel beınesi» – «Bopaı hanym» tarıhı dramasyndaǵy Bopaı róli úshin Leılo Beknazar, Q.Qýanyshbaev atyndaǵy Qazaq ulttyq mýzykalyq drama teatry (500 000 teńge).
- «Úzdik áıel beınesi» – «Eshkim de kináli emes» spektaklindegi Asyl róli úshin Dına Zaıtova, C.Seıfýllın atyndaǵy Qaraǵandy oblystyq qazaq drama teatry (500 000 teńge).
- «Sahnalyq jańa forma tabýdaǵy izdenisteri úshin» – «Máńgilik bala beıne» spektakli (rejısseri - Á.Ospanbaeva), A.Toqpanov atyndaǵy Jambyl oblystyq qazaq drama teatry (300 000 teńge).
- «Ekinshi plandaǵy úzdik er adam beınesi» – «Máńgilik bala beıne» spektaklindegi Depýtat róli úshin Darhan Mýslımov, Astana qalasy ákimdiginiń Qýyrshaq teatry (300 000 teńge).
- «Ekinshi plandaǵy úzdik áıel beınesi» – «Qaraly sulý» spektaklindegi Qyzmetshi kempir róli úshin Gúljııan Shyntemir, H.Bókeeva atyndaǵy Batys Qazaqstan oblystyq qazaq drama teatry (300 000 teńge).
- «Ekinshi plandaǵy úzdik áıel beınesi» – «Máńgilik bala beıne» spektaklindegi Qatıra róli úshin Aıjan Sadyqova, Astana qalasy ákimdiginiń Qýyrshaq teatry (300 000 teńge).
Qazaqstannyń eńbek sińirgen qaıratkeri, qazylar alqasynyń tóraıymy Álııa Bópejanova mundaı festıval ónerdiń damýyna áser etetinin atap ótti.
«Festıvaldik qozǵalystar jalpy ónerdiń damýyna, básekelistik pen jańa izdenisterdiń damýyna óte qatty áser etedi. Osylaısha talaı teatr ártisteri tanylyp, úlken shyǵarmalar dúnıege keledi. Roza zamandasyma shyǵarmashylyq tabys tileımin. Onyń shyǵarmalary teatrlarǵa azyq bolyp, bizdiń rýhanııatymyzdyń damýyna ólsheýsiz úles qosyp keledi»,- dedi Álııa Bópejanova.
Bıyl úshinshi márte Astana tórinde uıymdastyryp jatqan bul halyqaralyq festıvalge Ázerbaıjan, Qyrǵyzstan jáne Qazaqstannyń úzdik teatr ujymdary qatysty.
«Teatrlardyń qatysýymen ótken festıvaldiń basty maqsaty – túrki dúnıesiniń mádenı keńistigine esimi tanymal jazýshy-dramatýrg Roza Muqanovanyń dramatýrgııasyndaǵy rýhanı qundylyqtardy óskeleń urpaqqa dáripteý, teatrlar arasyndaǵy shyǵarmashylyq áriptestikti nyǵaıtý bolyp tabyldy. Astana qalasynyń ákimdigi men Mádenıet basqarmasy, Mýzykalyq jas kórermen teatrynyń uıymdastyrýymen mine osyndaı maqsattardy arqaý etken, ár kún saıyn kórermen nazaryna saǵat 11.00 men keshki 19.00-de eki márte qoıylymdar sahnalanyp, bir aptaǵa sozylǵan Halyqaralyq teatr festıvali óz máresine jetti. Kórermenge shynaıy teatr atmosferasyn syılaǵan festıvaldiń jemisti de, tabysty bir aptasy elimizdiń mádenı keńistiginde erekshe oqıǵaǵa aınaldy»,- dedi Mýzykalyq jas kórermen teatrynyń dırektory Ashat Maemırov.
Bul festıvaldiń ár nomınatsııasy boıynsha marapattaý týraly sheshimdi Qazaqstan men TMD elderiniń teatr synshylary jáne dramatýrgteri quramynan jasaqtalǵan bes adamnan turatyn qazylar alqasy, sarapshylar anyqtady.
Júldegerlerdi marapattaý rásimi Abaı atyndaǵy Memlekettik syılyqtyń laýreaty, Qazaqstannyń eńbek sińirgen qaıratkeri, jazýshy-dramatýrg Roza Muqanovanyń dramatýrgııasyna arnalǵan «TEATR ALL» III Halyqaralyq teatr festıvaliniń saltanatty jabylýynda Q.Qýanyshbaev atyndaǵy Qazaq ulttyq mýzykalyq drama teatrynda ótti.
