Roza Baǵlanovanyń shyǵarmashylyǵyna arnalǵan muraǵattyq dıski jaryqqa shyǵady
QYZYLORDA. QazAqparat - Aldaǵy ýaqytta Roza Baǵlanova oryndaǵan mýzykalyq týyndylar jınaqtalǵan muraǵattyq dıski jaryq kóredi, dep habarlaıdy QazAqparat tilshisi.
Qyzylordada Halyq qaharmany Roza Baǵlanova atyndaǵy respýblıkalyq «Aqmańdaılym» ánshiler baıqaýy ótken edi. Belgili ánshiniń atalmysh sharaǵa arnaıy kelgen balasy Tájen Baǵlanov atalmysh jaǵymdy jańalyqty jetkizdi.
«Biz buǵan deıin de mýzykalyq shyǵarmalar jınaqtalǵan dıskini jaryqqa shyǵardyq. Ol Qytaıda az ǵana taralymmen jasaldy. Bul dúnıe tez arada óz tyńdaýshysyn taýyp úlgerdi. Qazir bul baǵytta taǵy da jumys jasap jatyrmyz. Roza Baǵlanovanyń shyǵarmashylyǵyna arnalǵan dıskini kelesi jyly jurtshylyq nazaryna usynatyn bolamyz», - dedi Tájen Baǵlanov.
Sondaı-aq, ol budan buryn Almaty qalasynda Roza Baǵlanova jóninde orys tilinde ómirbaıandyq kitaptyń tusaýkeseri ótkenin tilge tıek etti. Kitap qazaqshadan orys tiline aýdarylǵan.
«Qazaq tilindegi kitap 2007 jyly jaryqqa shyqty. Biz ony orys tiline aýdarýǵa sheshim qabyldadyq. Orys tildi oqyrmandar Roza Baǵlanova ómiriniń jarqyn sátterin áńgimelegen dúnıeden habardar bolsyn degen nıet tanyttyq. Buryn atalmysh kitap az taralymmen oqyrman qolyna tıdi. Endigi kezekte taralym sanyn da ulǵaıtýǵa nazar aýdardyq», - dedi Tájen Baǵlanov.
Esterińizge sala ketelik, 6-7 qarasha kúnderi Qyzylorda oblysynda Halyq qaharmany Roza Baǵlanova atyndaǵy respýblıkalyq «Aqmańdaılym» ánshiler baıqaýy ótti.
