Roza Baǵlanovanyń ómiri jaıly drama kórermenge jol tartady

NUR-SULTAN. QazAqparat - Osy jyly Roza Baǵlanovanyń ómiri jaıly tarıhı drama teleefırde shyǵady, dep habarlaıdy QazAqparat.

QR Aqparat jáne qoǵamdyq damý mınıstrliginiń qoldaýymen 18-19 jeltoqsan 12:30-da «Habar» telearnasy KSRO Halyq ártisi Roza Baǵlanovanyń ómirine arnalǵan tarıhı «Bulbul» telehıkaıasynyń tusaýkeserin usynbaq.

Jaqynda Almatyda aty ańyzǵa aınalǵan ánshiniń týystary men dostarynyń qatysýymen jabyq kórsetilim ótti. 2022 jyldyń 1 qańtarynda týǵanyna 100 jyl tolady.

«Bulbul» telehıkaıasy – uly tulǵanyń ómirinen syr shertetin zamanaýı baıopık kanondaryna quralǵan bıografııalyq kartına. Roza Baǵlanova ómiriniń negizgi tustaryn ashatyn tarıhı bólimi de bar. Shyǵarmashylyqtan tys ómiri de kórsetilgen. Roza Tájibaıqyzynyń issaparlary men ánshiliginen bólek belsendi azamattyq ustanymy da bar bolatyn. Aral teńizi men Semeı polıgony máseleleri jaıly jıi aıtatyn.

- Bul kúnder óte aýyr, biraq óte qyzyqty ótken edi. Karantınǵa baılanysty túsirilimdi keıinge shegerip júrdik. Biraq eshteńege qaramastan serıaldy Tashkentte de, Mınskide de, Almatyda da túsirdik. Dekoratsııa, sahnalyq kostıýmder tańdaý jáne bezendirý boıynsha kóp jumys jasaldy. Tipti bazar aralap, ájelerden satyp alyp ta júrdik, - dedi bas prodıýser Gúlnur Mamasarıpova.

Joba rejıssery: Sanjar Omarov

Operator: Karshyǵa Ospanov

Basty rólderde: Zarına Jákenova jáne Darhan Súleımenov