Roza Baǵlanovanyń 100 jyldyǵyna arnalǵan sharalar resmı túrde bastaldy

NUR-SULTAN. QazAqparat - Elordada Roza Baǵlanovanyń 100 jyldyq mereıtoıyna arnalǵan «Qazaqtyń qaharman qyzy» atty saltanatty kontsert ótti, dep habarlaıdy QazAqparat «Qazaq áýenderi» AQ-ǵa silteme jasaı otyryp.

Kontsertte Roza Rymbaeva, Tamara Asar, Renat Ǵaısın, Jubanysh Jeksen, Aıgúl Qosanova, Zarına Altynbaeva, Ámire, Rýhııa Baıdúkenova, Janet (Belarýs), Hýlkar Abdýllaeva (Ózbekstan), Mırbek Atabekov (Qyrǵyzstan) jáne ózge de tanymal ártister óner kórsetti.

Sonymen birge dańqty tulǵanyń nemeresi, on jasar Úrbıbi Baǵlanova da sahnaǵa kóterildi. Aıta keteıik, Roza Baǵlanovanyń azan shaqyrylyp qoıǵan negizgi esimi - Úrbıbi bolǵan.

Sondaı-aq kontsertke ánshiniń uly Tájen men kelini Maral, R.Baǵlanovamen birge 24 jyl etene qyzmet etken prodıýser Qýanysh Ábdiqalymov ta keldi.

Kontserttiń betashar sózinde Mádenıet jáne sport mınıstri Dáýren Abaev ıÝNESKO deńgeıinde toılanatyn tulǵalar tizimine engen dańqty ánshiniń ǵasyrlyq toıy resmı túrde bastalǵanyn aıryqsha atap ótti.

Aldaǵy ýaqytta Qyzylorda, Almaty, Máskeý qalalarynda mereıtoılyq kontsertter jáne Nur-Sultan qalasynda Halyq qaharmany Roza Baǵlanova atyndaǵy halyqaralyq vokaldyq konkýrs uıymdastyrylmaq. Ánshiniń 100 jyldyǵy ıÝNESKO-nyń Parıj qalasyndaǵy shtab páterinde atalyp ótedi.

Roza Tájibaıqyzy - Halyq qaharmany ataǵyna ıe bolǵan Qazaqstandaǵy jalǵyz ánshi. Ol ómiriniń 70 jyldan astam ýaqytyn sahnada ótkizip, álemniń 50-den asa elinde boldy, 25 tilde án aıtty.