«Roza Baǵlanova» mıýzıkliniń premerasy ótti
NUR-SULTAN. QazAqparat - «Qazaqkontsert» uıymyna qarasty «Astana Musical» memlekettik teatry kórermender kópten kútken Roza Baǵlanova» mıýzıkliniń premerasyn usyndy, dep habarlaıdy QazAqparat.
Jańa shyǵarma Qazaqstan jáne KSRO halyq ártisi, Halyq qaharmany Roza Baǵlanovanyń 100 jyldyq mereıtoıyna arnalady.
Mıýzıkl qalyń kórermenge halyqtyń súıikti ánshisi Roza Baǵlanovanyń ishki jan dúnıesi men onyń qaıtalanbas óner álemin pash etti.
«Roza Baǵlanova» mıýzıkliniń rejısseri ári teatrdyń kórkemdik jetekshisi Eslám Nurtazın málimdegendeı, jańa týyndy ánshiniń balalyq shaǵynan bastap soǵys jyldaryndaǵy taǵdyry týraly syr shertedi.
«Mıýzıklde Roza Baǵlanovanyń án álemine kelýi, soǵys jyldaryndaǵy qaısarlyǵy, óner jolyndaǵy qıyndyqtary men taǵdyryndaǵy syn saǵattar kórinis tapqan. Oqıǵa jelisi ánshiniń 1930-1945 jj. aralyǵyndaǵy ómirin sýretteıdi. Sahnada Roza Baǵlanova oryndaǵan ataqty týyndylar, arnaıy jazylǵan avtorlyq týyndylar shyrqaldy», - dep jetkizdi rejısser.
Mıýzıklge arnalǵan mýzykany QR Eńbek sińirgen qaıratkeri Artýr Orenbýrgskıı jazdy, dramatýrgter – Efrat Sharıpov, Shyńǵys Maman, Aıdyn Sahaman, Ánnás Baǵdat; Eslám Nurtazın.
Jalpy qoıylym barysynda sahnada 60 astam ártis óner kórsetti.
Basty róldi somdaǵan ártistiń biri – Zarına Jakenova Roza Baǵlanovanyń obrazyn somdaý úshin barynsha izdengenin jetkizdi. «Roza Tájibaıqyzy – ulttyń úni atanǵan ataqty ánshi. Onyń obrazyn somdaý – bul úlken jaýapkershilik. Ol kisiniń tulǵalyq qasıetterin, soǵys jyldaryndaǵy qaısarlyǵyn, án aıtýdaǵy ózindik qaıtalanbas erekshelikterin qalyń kópshilik óte jaqsy biledi. Búgingi qoıylymda ánshiniń ómirbaıanyndaǵy osy tustaryn biz jańa qyrynan ashýǵa tyrystyq», - dep bólisti aktrısa.
Budan buryn Zarına Jakenova Roza Baǵlanovanyń rólin «Bulbul» telehıkaıasynda somdaǵan edi.
«Bul apamyzdyń ómirine arnalǵan alǵashqy mıýzıkl. Ómiriniń eń qıyny sátteri sahnalandy. Erekshe qoıylym, qanshama emotsııa aldyq. «Astana Musical» teatryna zor alǵysymyzdy aıtamyz», - dep jetkizdi áserin Roza Baǵlanovanyń uly Tájen men kelini Maral Baǵlanovtar.
Jańa mıýzıkl kórermenderge umytylmas áser syılap, olardyń zor yqylasyna bólendi. Qoıylymdy tamashalaýǵa kelgen belgili teatr qaıratkerleri, ónertanýshylar men zııaly qaýym ókilderi jańa týyndyny joǵary baǵalady. «Ártister joǵary deńgeıde oınady, halyq óte jaqsy qabyldady. Roza Baǵlanovanyń esimi ulyqtalyp, jas urpaqqa tamasha úlgi boldy», - degen baǵa berdi belgili aktrısa Merýert Ótekeshova.
Aldaǵy ýaqytta «Astana Musical» memlekettik teatry «Roza Baǵlanova» mıýzıklin endi el óńirlerinde kórsetip, qalyń kópshilikke usynbaq.
Eske salsaq, Memleket basshysy Qasym-Jomart Toqaev uly ánshiniń esimin halyq jadynda máńgi saqtaý sharalaryn qabyldaýdy tapsyryp, byltyr soǵan sáıkes «Qazaqkontsert» memlekettik kontserttik uıymyna» Roza Baǵlanovanyń esimi berilgen edi. Bıyl ánshiniń mereıtoıy ıÝNESKO kóleminde atalyp ótilýde.
