Roza Álqoja jas ta bolsa jaqsy, esti ánderimen halyq júregin jaýlap aldy - Maqpal Júnisova
ALMATY. Aqpannyń 15-i. QazAqparat /Erlik Erjanuly/ - Sahna juldyzy retinde halyq seni saǵynyp, ylǵı izdep júrsin. Qazaqstannyń halyq artısi Maqpal Júnisova keshe Almatyda aqyn, ánshi, sazger Roza Álqojanyń "Myna ómir ǵajap qandaı" dep atalatyn alǵashqy shyǵarmashylyq keshinde oǵan osyndaı tilek bildirdi,
dep habarlaıdy QazAqparat.
"Roza Álqoja jas ta bolsa ózin-ózi halyqqa tanytqan jáne jaqsy, esti ánderimen halyq júregine jol tapqan qyzdardyń biri. Ánderińmen halyqty súısintip, árdaıym joǵary bıikten kórine ber. Bolashaqta sahnanyń úlken juldyzy retinde halyq saǵynyp, ylǵı izdep júrsin. Sát sapar tileımin", deıdi Qazaqstannyń halyq artısi, Memlekettik syılyqtyń laýreaty Maqpal Júnisova. Óner juldyzy Roza Álqojamen taıaýda ǵana jaqyn tanysqanyn, endi aldaǵy ýaqytta halyqqa sazgerdiń jańa ánderin tanystyrýǵa yqylasty ekenin aıtty. Sondaı-aq shyǵarmashylyq keshtiń shymyldyǵyn ashyp, R. Álqojanyń "Myna ómir ǵajap qandaı" dep atalatyn jańa albomynyń tusaýyn kesti. 9-shy synyptan bastap án jazǵan jas sazgerdiń búgingi tańda 40-qa jýyq áni bar. Onyń shyǵarmalaryn oryndap júrgen "Keme qalǵan" toby men Ajar Túzelbekqyzy, Baıan Nurmysheva, Aqbota Kerimbekova, Erkin Nurjanov, Lázzat Janamanova, Jappar Malıkov sııaqty ánshiler kesh qonaǵy boldy.
