Roza Abdýllaeva: Qıyn sátti birlikpen eńseremiz
NUR-SULTAN. QazAqparat - Qazaq halqynyń qanyna sińgen qasıetterdiń biri- baýyrmaldyq. Osyndaı tektiligimizdi qıyn sátte kórsetip jatqanymyz bárimizdi qýantady. Bul týraly «Bereke» qoǵamdyq birlestiginiń tóraǵasy Roza Abdýllaeva aıtty, dep habarlaıdy QazAqparat.
«Tuńǵysh Prezıdentimiz Nursultan Nazarbaev elimizdegi barlyq kásipkerlerge úndeý joldap, el ishindegi jaǵdaıǵa beıjaı qaramaýyn tapsyrdy. Kásibin órge domalatyp otyrǵan ár azamat týǵan ólkesi men óz aımaǵyndaǵy turǵyndarǵa qoldaý bildirip jatyr. Bul búgingi tańda halyq ıgiligi men olardyń saqtyq sharalary úshin úlken kómek dep bilemin.
Túrkistan qalasynyń kásipkerleri de bul ıgi bastamadan tys qalyp qoıǵan joq. Aty jaman derttiń aldyn alý sharalaryna arnaıy qor ashylyp, Turan tórindegi tekti tulǵalar túgeldeı atsalysýda. Saýda qatarlaryndaǵy baǵanyń turaqtyǵyn saqtap turýy da kásip ıeleriniń janashyrlyǵy dep oılaımyn»,-deıdi birlestik tóraǵasy.
Onyń pikirinshe, bul indet bárimizdi alańdatyp qoıǵany ras. Sol úshin osyndaı qysyltaıań kezde halqyna qol ushyn sozǵan barlyq kásipkerlerge senim artamyz. Bul kúnderden tek birligimiz ben tatýlyǵymyzdy tý etip qana shyǵa alamyz.
