Roı Djons Jánibek Álimhanulynyń dopıng daýyna qatysty pikir bildirdi

ASTANA. KAZINFORM — Jartylaı aýyr salmaqta absolıýtti chempıon, tórt salmaqta álem chempıony atanǵan áıgili boksshy kishi Roı Djons Astanada jas boksshylarǵa arnalǵan sheberlik saǵatyn ótkizedi. Іs-shara Astana qalasy Sportty damytý dırektsııasynyń qoldaýymen ótedi, dep habarlaıdy Kazinform tilshisi.

Bir jyl buryn kishi Roı Djons Qazaqstanǵa kelip, Qaraǵandyda ótken bokstan Qazaqstan chempıonatyna qatysqan bolatyn. Ol bul saparǵa sport fýnktsıoneri Nurǵazy Jaralǵapov pen Qaraǵandy oblysynyń dene shynyqtyrý jáne sport basqarmasynyń basshysy Serik Sápıevtiń shaqyrýymen kelgen. Eske sala ketsek, sol kezde Roı Djons chempıonattyń basty qonaǵy bolyp, ashylý saltanatynda rep oryndaǵan.

Qazaqstandyq boksshy Jánibek Álimhanulyna qatysty dopıng daýy jóninde pikir bildirgen Roı Djons ázirge naqty qorytyndy jasaý erte ekenin aıtty.

— Iá, men Jánibek Álimhanulyn bilemin. Dopıng máselesine kelsek, naqty eshteńe aıta almaımyn. Búginde onyń túri kóp, al sportshylardy ártúrli ádispen tekseredi: keıde barlyq parametr boıynsha birden tekserip jatady. Sondyqtan birjaqty pikir aıtý qıyn. Meniń bilýimshe, ádette eki synama alynady. Eger birinshiden kúmándi zat tabylsa, ekinshisin tekseredi. Al ekinshi synama taza bolsa, sportshyda bári qalypty dep esepteledi, — dedi amerıkalyq boksshy.

Buǵan deıin WBO jáne IBF tujyrymdary boıynsha orta salmaqtaǵy álem chempıony Jánibek Álimhanuly kezekti jekpe-jegi aldyndaǵy dopıng testinen ótpeı qalǵany anyqtaldy.

Keıinnen sportshy dopıng daýyna qatysty pikir bildirdi.

3 jeltoqsanda Jánibek Álimhanuly men Laranyń jekpe-jegi resmı túrde toqtatylǵany belgili boldy.

Álimhanulynyń salmaǵynda qazaq boksshysy chempıondyq jekpe-jekke shyǵatyny aıtyldy.