Roı Djons: Qazaqstan - úzdik boksshylar otany
ALMATY. QazAqparat - Almatyǵa óziniń jeke saparymen dańqty boksshylardyń biri kishi Roı Djons keldi, dep habarlaıdy QazAqparat tilshisi.
«Dostyq» sport kesheninde boksshy jankúıerlerine arnap baspasóz máslıhatyn ótkizdi. Kezdesýde ol suraqtarǵa jaýap berip, sýretke tústi. Jıynǵa Sıdneı olımpıadasynyń altyn júldegeri Ermahan Ybyraıymov ta keldi.
«Qazaqstanǵa kelgenime qýanyshtymyn. Men sizderdiń elderińizdi súıemin. Qazaqstan - úzdik boksshylar otany. Sizderdiń elderińizdi adamdardy ultqa, násilge, dinine qaramaı qurmettep, syılaıdy, sonysy qatty unaıdy», - dedi Roı Djons.
Kezdesýde qyzyqty suraqtar ǵana qoıylǵan joq. Jınalǵan qaýym arasynan bir jankúıer boksshydan onyń kózine jaqynnan, tik qaraýǵa ruqsat surady. Buǵan jymııa jaýap qatqan, Roı Djons kelisti.
Sharanyń uıymdastyrýshysy Qazqom bank ókiliniń habarlaýynsha, mártebeli meıman búgin tańerteń múgedek balalar aýrýhanasyna baryp, «Qus joly» qaıyrymdylyq sharasyna óz úlesin qosýǵa nıet bildirgen.
Boksshynyń ózi Qazaqstanǵa kásibı bokstyń damýyna kómektesý úshin kelgenin aıtty.
Kezdesý sońynda eki adam boksshynyń qoltańbasymen eki bylǵary qolǵapty estelikke aldy.
Kishi Roı Djons - AQSh-tyń kásipqoı boksshysy. 1988 jylǵy Olımpıada oıyndarynyń kúmis júldegeri. Ol boks tarıhynda orta salmaqta chempıon bolyp, keıin ekinshi orta salmaqta jeńiske, odan keıin jartylaı aýyr jáne aýyr salmaqta tıtýldy jeńip alǵan alǵashqy boksshy.
