Rostov túbindegi qorymnan altyn men júzdegen temir jebe tabyldy
ASTANA. QazAqparat - RǴA Arheologııa ınstıtýtynyń qyzmetkerleri bizdiń dáýirimizdiń birinshi ǵasyrynda jerlengen aqsúıek sarmat áıeliniń qorymyn tapty, tonap-talaýshylar qorymǵa tıispegendikten, arheologtar odan kóptegen zattar: áshekeı buıymdar, qarý, quraldar men kerek-jaraqtar aldy, dep habarlaıdy ınstıtýttyń habarlamasyna silteme jasaǵan N+1 basylymy.
Qorym Rostov oblysyndaǵy 29 obanyń birinen, jańa áýejaıdyń qurylys ornynda tabyldy.
Ǵalymdar tapqan zattardyń arasynda qarýdyń kóp túri: pyshaqtar, jasalyp aıaqtalmaǵan qylysh, 100-den astam sadaq jebesi bolǵan. Budan basqa altyn, qoladan jasalǵan kóptegen áshekeı buıymdary, kerek-jaraqtar: aına, aǵash tabaq, saptyaıaq, at er-turmanynyń bólikteri tabyldy.
Sarmat taıpalary bizdiń dáýirimizge deıin VI-IV ǵasyrlarda shyǵys Eýropa aýmaǵyn mekendegen. Olar kóshpeli ómir súrip, mal baqqan.
