Rospotrebnadzor Reseıde chıkýngýnıa bezgeginiń taralýyn joqqa shyǵardy

ASTANA. KAZINFORM — Reseıde chıkýngýnıa bezgeginiń taralý qaýpi joq, óıtkeni ınfektsııany taratatyn masalardyń popýlıatsııasy tabylmady. Bul týraly Rospotrebnadzor habarlady, dep jazdy TASS.

— Reseı Federatsııasynyń aýmaǵynda chıkýngýnıa bezgeginiń taralýynyń epıdemıologııalyq qaýpi joq. Óıtkeni aýrýdy tasymaldaýshy masalardyń turaqty popýlıatsııasy joq. Klımattyq jáne qorshaǵan orta faktorlary olardyń kóbeıýine nemese vırýstyń adamdar men jándikter arasynda úzdiksiz berilýine yqpal etpeıdi. Birli-jarym tirkelgen jaǵdaı ınfektsııanyń jergilikti jerde keń taraldy deýge kelmeıdi. Biraq týrıster endemııalyq aımaqtardaǵy qaýipsizdik erejelerin este saqtaýy kerek, — delingen habarlamada.

Jedel anyqtaýdy jáne jyldam áreket etýdi qamtamasyz etý úshin Rospotrebnadzor patogendi dıagnostıkalaý úshin otandyq synaq júıesin ázirledi. Masalardyń túrlerin, olardyń sanyn, ártúrli qozdyrǵyshtarmen juqtyrý deńgeıin zertteıtin turaqty entomologııalyq monıtorıng júrgiziledi.

Chıkýngýnıa bezgegi tabıǵı túrde tropıkalyq Afrıkada, Úndistanda, Ońtústik-Shyǵys Azııada jáne Úndi muhıtynyń araldarynda kezdesedi. Olarda maýsymdyq epıdemııalar jıi tirkeledi. Bul jaǵdaılar Meksıka men Gvatemalada da tirkeldi.

— Infektsııa qaýpin azaıtý úshin Rospotrebnadzor endemııalyq aımaqtarǵa sapardy josparlaǵan týrısterge jeke qorǵanys sharalaryn qoldanýdy usynady: nusqaýlyqqa sáıkes repellentterdi qoldanýdy, shalbar, uzyn jeńdi ashyq tústi kıimderdi kııýdi, áınekti torlar nemese basqa jándikterge qarsy tosqaýyldardy qoldanýdy usynady, — dep qorytyndylady vedomstvo.

Dúnıejúzilik densaýlyq saqtaý uıymy buǵan deıin 2025 jyldyń basynan beri álemde chıkýngýnıa bezgeginiń rastalǵany jáne kúdikti 445 myńnan astam jaǵdaı tirkelgenin habarlady. Sondaı-aq olardyń 155-i qaıtys bolǵanyn, bezgek ártúrli aımaqta taralý qaýpi saqtalyp otyrǵanyn atap ótti.

Buǵan deıin Reseıde chıkýngýnıa bezgeginiń alǵashqy syrttan ákelingen jaǵdaıy tirkelgenin jazǵanbyz.