«Roskosmos» Baıqońyrǵa turaqty áýe reısterin uıymdastyrmaq

ASTANA. QazAqparat - Reseıdiń «Roskosmos» qurylymy Jerústi ǵarysh ınfraqurylymdary nysandaryn paıdalaný ortalyǵy Baıqońyrǵa turaqty reısterdi oryndaıtyn avıakompanııalar arasynda tender jarııalady. Muny týrıster ǵana emes reseılik ǵarysh salasynyń qyzmetkerleri paıdalanýy kózdelip otyr, dep jazady «Izvestııa» gazeti.

Tender Baıqońyr ǵarysh aılaǵyndaǵy Kraınıı áýejaıynyń ushý-qoný jolaǵy qaıta qalpyna keltirilgen soń jarııalanǵan. Qazir onda barlyq ushaq túrleri qona alady, deıdi ortalyqtyń bas dırektory mindetin atqarýshy Rano Djýraev.

Onyń aıtýynsha, «baǵdarlarǵa bes áýe kompanııasy qyzyǵýshylyq tanytqan. Atap aıtar bolsaq, qazaqstandyq tasymaldaýshy SCAT Astana men Almatydan reıster júrgizýdi kózdep otyr. Qalǵan tórteýi reseılik kompanııalar, olardyń servıs pen bılet baǵasy boıynsha usynysynyń ońtaılysy ǵana tańdalady».

Qazir Baıqońyrǵa «Roskosmostyń» jáne Ǵaryshkerlerdi daıyndaý ortalyǵynyń arnaıy reısteri ǵana ushady, olar «Energııa-Býran» baǵdarlamasynan qalǵan jolaqqa qonady.

Baıqońyrǵa turaqty reıster ashý týrıster ákelýdi jeńildetedi. Qazir ǵarysh aılaǵyna týrlar uıymdastyrýshy operatorlar tizimi jasalǵan.