Roskosmos adamdy Aıǵa ushyrý jobasynyń ýaqytyn keıinge shegerdi

ASTANA. QazAqparat - Roskosmos bıýdjettik qarajatty únemdeý úshin adamdy Aıǵa ushyrý jobasyn iske asyrý ýaqytyn keıinge shegerýge májbúr boldy, dep habarlaıdy RBK.

Bastapqyda adamdy Aıǵa qondyrý 2030 jylǵa josparlanǵan bolatyn. Merzimdi ózgertýge Aıǵa ushý-qoný keshenin (AUQK) jasaý júrgizilip otyrǵan PBKK-2 (perspektıvaly basqarylatyn kólik kesheni) tájirıbelik-konstrýktorlyq jumystyń aıtarlyqtaı tómendeýi sebep bolǵan.

««PBKK-2» tájirıbelik-konstrýktorlyq jumysyn qarjylandyrý shamamen eki ese tómendetilgen, bul AUQK qurylýdyń keshigýi men ushý synaqtarynyń bastalýyn 2-3 jylǵa keshigýine ákelip soqtyrady. AUQK ushý synaqtary 2029-2030 jyldary bastalady dep kútilip otyr», - delingen Roskosmostyń 2016-2025 jyldardaǵy Federaldyq ǵarysh baǵdarlamasy jobasynyń tanystyrylymynda.