Roskomnadzor Reseıde Roblox platformasyn buǵattan shyǵarýdan bas tartty

ASTANA. KAZINFORM – Roskomnadzor Reseıde Roblox platformasyn qaıta iske qosýǵa eshqandaı negiz kórip otyrǵan joq.

- Qazirgi ýaqytta Roblox platformasyn buǵattan shyǵarýǵa eshqandaı negiz joq, - dep málimdedi Roskomnadzordyń baspasóz qyzmeti TASS agenttigine. 

Jeltoqsan aıynyń basynda vedomstvo Roblox onlaın-oıyn platformasyn resmı túrde buǵattaldy. Reseıdiń baılanys jáne aqparat salasyn baqylaý qyzmeti bul sheshimdi servıs arqyly ekstremıstik materıaldardyń taralýy jáne LGBT-ıdeıalardyń nasıhattalýymen túsindirdi.

Vedomstvonyń málimdemesine sáıkes, balalar arasynda tanymal platformada terrorıstik áreketterdi beıneleý, mektepke shabýyl jasaý, qumar oıyndarǵa qatysý sııaqty kontent kezdesken. Sonymen qatar, vedomstvo Roblox-ta balalarǵa qatysty «jynystyq sıpattaǵy áreketter, ıntım foto talap etý, azǵyndyqqa ıtermeleý jáne zorlyq kórsetý qaýpi bar» ekenin atap ótti.

Keıinirek vedomstvo platformanyń óz jumysyn Reseı zańnamasyna sáıkestendirgeni týraly habarlandyrýynan keıin Roblox-pen yntymaqtastyqqa daıyn ekenin málimdedi. 
Kazinform úshin arnaıy TASS seriktes agenttigi usynǵan.

Buǵan deıin Roblox chat paıdalanýshylary úshin jas shekteýlerin engizetinin jazǵan bolatynbyz.