Rosatomnyń basty mindetteriniń biri — AES úshin jergilikti kadrlar daıyndaý

ASTANA. KAZINFORM — AES qurylysyna Qazaqstan jumysshylarynyń qatysý paıyzyna qatysty másele talqylanǵan joq. Bul týraly Atom energetıkasy jónindegi agenttikten málim etti.

— AES qurylysyna Qazaqstan jumysshylarynyń qatysý paıyzyna qatysty másele ázirshe jeke qaralǵan joq. Degenmen, jergilikti qyzmetkerlerdi tartý tıisti attestatsııadan ótip, kásibı quziretin rastaǵan jaǵdaıda múmkin bolmaq. Qazaqstan mamandarymen kelisimsharttyq qatynas jalaqy tóleý tártibin qosa alǵanda Qazaqstan Respýblıkasynyń Eńbek kodeksi men zańnamalaryna saı rásimdeledi, — dedi agenttikten BAQ ókilderiniń saýalyna oraı.

Agenttik málimetinshe, qurylys aıaqtalyp, stansany paıdalaný kezeńinde shamamen 2 myń jumys orny qurylady. Olar Qazaqstan zańnamasyna tolyqtaı saı bolady. 

— Konsortsıým kóshbasshysy mindetteriniń biri — stansany paıdalaný qyzmetkerleri úshin jergilikti kadrlardy daıyndaý. AES qurylysyn qarjylandyrý Reseı Federatsııasy usynatyn memlekettik eksporttyq qarjylandyrý esebinen kózdeledi. Bul tetik maqsatty jáne kezeń-kezeńmen qarjylandyrýdy qamtamasyz etedi. Bul kestedegi irkilister men qurylystyń uzaqqa sozylýyna jol bermeıdi. Sońǵy derekterge sáıkes, Rosatom sanktsııalyq tizimde joq. Sanktsııa salý máselesi ıadrolyq derjava elderiniń qatysýymen BUU Qaýipsizdik keńesiniń otyrysynda sheshiledi, — dedi vedomstvodan.

Buǵan deıin «Rosatom» kompanııasy Qazaqstandaǵy alǵashqy atom elektr stantsııasyn salý jobasy boıynsha halyqaralyq konsortsıýmnyń kóshbasshysy retinde anyqtalǵanyn jazǵan edik.

Sonymen qatar Atom energetıkasy jónindegi agenttik tóraǵasy Almasadam Sátqalıev Qazaqstandaǵy taǵy bir AES-ti qytaılyq vender salatynyn málim etti.

AES-ten óndiriletin elektr energııasynyń quny JEO men JES-ten alynatyn elektr energııasyna qaraǵanda joǵary bolady.