«Rosatom» Ózbekstanda AES qurylysyn qashan bastaıdy
ASTANA. KAZINFORM – Ózbekstannyń Jızaq oblysynyń Farısh aýdanynda RITM-200N reaktory bar az qýatty energetıkalyq bloktyń reaktor ǵımaratynyń beton irgetasyn qalaý jumystary bastaldy, dep habarlaıdy Kazinform.
Aıaqtalýy 2026 jyldyń sáýir aıyna josparlanǵan reaktor ǵımaratynyń beton irgetasyn qalaý jumystary kezinde shamamen 900 tekshe metr qospa quıylady. Osy kezeńnen keıin reaktor ǵımaratynyń irgetasy tegisteledi, sý ótkizbeý jáne jerge qosý múmkindikteri qamtamasyz etiledi.
Reseılik «Rosatom» memlekettik korporatsııasynyń basshysy Alekseı Lıhachevtiń habarlaýynsha, Ózbekstandaǵy atom elektr stantsııasynyń qurylysy 2026 jyldyń jazynda irgetas quıylǵannan keıin bastalady.
Eske sala ketsek, Reseı Ózbekstanda az qýatty AES salmaq ekenin jazdyq.
Bul Reseı prezıdenti Vladımır Pýtınniń Ózbekstanǵa jasaǵan memlekettik sapary aıasynda boldy.
Betondaý jumystary bastalmas buryn RITM-200N eki reaktorlyq qondyrǵysy bar eki energoblokty paıdalanýǵa ruqsat alyndy.
- Bul mańyzdy sheshim bizge tańdalǵan oryndy resmı túrde bekitýge jáne bekitilgen biriktirilgen AES konfıgýratsııasy sheńberinde shaǵyn atom elektr stantsııasynyń tolyq kólemdi qurylysyn bastaýǵa múmkindik beredi. Ruqsat ulttyq erejeler men halyqaralyq qaýipsizdik standarttaryna sáıkes berildi, - dep habarlady «Rosatom» baspasóz qyzmeti.
Osyǵan deıin Ózbekstanda boı kóteretin AES alańynda beton quıý jumystary bastalǵanyn jazdyq.