«Rosatom» korporatsııasy Ulybrıtanııa engizgen sanktsııalarǵa baılanysty málimdeme jasady

ASTANA. KAZINFORM – Ulybrıtanııa «Rosatomnyń» úsh qurylymy men eki top-menedjerine qatysty shekteý sharalaryn jarııalaǵany belgili bolǵan.

«Rosatom» baspasóz qyzmetiniń habarlaýynsha, kompanııa kez kelgen birjaqty shekteýlerdi halyqaralyq quqyq turǵysynan zańsyz dep sanaıdy.

– Beıbit atom salasyndaǵy yntymaqtastyqtyń basym baǵyty – qaýipsizdik. Mundaı sharalar osy negizgi qaǵıdatqa keri áserin tıgizedi, – delingen korporatsııanyń túsindirmesinde.

Sondaı-aq kompanııa atom energetıkasy salasynda álemdik kóshbasshy ekenin atap ótti.

– «Rosatom» atom energetıkasy salasyndaǵy sózsiz álemdik kóshbasshy jáne jekelegen memleketterdiń birjaqty ári legıtımdi emes sheshimderi bul mártebege nuqsan keltire almaıdy. Memlekettik korporatsııa sheteldegi barlyq jobalary boıynsha mindettemelerin oryndaýdy jalǵastyryp keledi. Shetelde atom elektr stantsııalaryn salý boıynsha álemde birinshi oryndamyz, naryqtaǵy úlesimiz – 90%. Sondaı-aq ıadrolyq otyn ónimderi naryǵynyń negizgi qatysýshysymyz, – dep málimdedi holdıng.

Sonymen qatar atalǵan korporatsııa sheteldegi barlyq jobalar boıynsha mindettemelerin oryndaýdy jalǵastyryp jatqanyn jetkizdi.

– Seriktestermen birlesip ıadrolyq medıtsına jáne basqa da joǵary tehnologııalyq salalarda jobalardy iske asyryp jatyrmyz, 60-tan astam elmen yntymaqtastyq ornatqanbyz jáne olar úshin senimdi áriptes bolyp qala beremiz, – dep tolyqtyrdy baspasóz qyzmeti.

Al QR Atom energııasy jónindegi agenttigi qazirgi ýaqytta Qazaqstandaǵy AES qurylysy jobasy boıynsha jumystar josparly túrde júrip jatqanyn aıtty.

- Sanktsııalar tek «Rosatom» korporatsııasynyń perımetrindegi jekelegen zańdy jáne jeke tulǵalarǵa ǵana qatysty. Atom energııasy agenttiginiń atalǵan sanktsııaǵa ilikken kompanııalarmen sharttyq qatynastary joq jáne Qazaqstandaǵy atom elektr stantsııasyn salý barysynda olardy qosalqy merdiger retinde tartý josparlanbaıdy, - delingen habarlamada.

Sonymen qatar vedomstvo biz jekelegen elderdiń sanktsııalyq saıasatyndaǵy ózgeristerdi muqııat qadaǵalap, joba boıynsha aldaǵy jumysta tıisti táýekelderdi eskeremiz dep atap ótken.

Buǵan deıin Ózbekstannyń Jızaq oblysyna qarasty Farısh aýdanynda ótken qoǵamdyq tyńdaý aıasynda «Rosatom» memlekettik korporatsııasynyń ókilderi yqtımal sanktsııalardyń áseri týraly suraqqa jaýap bergen edi. 

Sonymen qatar Atom energııasy jónindegi agenttik pen «Rosatom» AES salý jónindegi jol kartasyn bekitti.